Руанда пойтахти Кигали шаҳрида 31 мартдан 2 апрелгача Пара Таэквондо буйича Африка II очиқ чемпионати бўлиб ўтди. Мазкур мусобақада 17 мамлакатдан 44 нафар спортчи иштирок этди. Мусобақада Ўзбекистон терма жамоаси шарафини 4 нафар спортчи - Сарваржон Обиджонов, Санжарбек Мухторов, Зиёда Исоқова ва Фарҳод Мамазиёев ҳимоя қилишди. 

Ўзбекистон терма жамоаси аъзолари Африка очиқ чемпионатида муваффақиятли иштирок этишди ва жами 4та медалга сазовор бўлиб, умумжамоа ҳисобида мусобақани кучли учликда якунлашди. 

Фарҳод Мамазиёев финалга қадар барча рақибларини мағлуб этиб, ҳал қилувчи баҳсда Конго Демократик Республикаси вакилини 9:1 ҳисобида таслим қилди ва олтин медални қўлга киритди. Зиёда Исоқова эса финал баҳсида олтин очко эвазига марокашлик рақибасини 1:0 ҳисобида енгди. Сарваржон Обиджонов ва Санжарбек Мухторов бронза медалларга лойиқ кўрилишди. 

Маълумот учун, 2020 йили Токиода бўлиб ўтадиган XVI Паралимпия ўйинлари дастуридан Пара Таэквондо ҳам ўрин олган. Африка Очиқ чемпионати ғолиблари ана шу Паралимпия ўйинлари учун қимматли 20 рейтинг очкосини қўлга киритишди. Бобур Қўзиев раҳбарлигидаги терма жамоа 4 апрель куни Тошкентга қайтиб келади.