Украина миллий коррупцияга қарши бюроси раҳбари Артём Ситник «1+1» телеканали эфирида баёнот беришича, Украина Миллий (марказий) банки раҳбарияти маблағларни ўзлаштирганлик бўйича текширувдан ўтказилмоқда. Улар тижорат банкларини қайта молиялаштириш учун ажратилган маблағларни мақсадсиз сарфлаганликда гумон қилинаяпти, деб хабар қилмоқда РИА Новости агентлиги.

«Бир неча ойдирки, Украина Миллий банки раҳбарларига нисбатан жиноий иш олиб борилмоқда. Улар тижорат банкларини қайта молиялаш маблағларини ўзлаштириш билан боғлиқ», — деган у. 

Ситникнинг сўзларига кўра, ушбу ишда харажатларнинг қай даражада қонунийлиги текширилади. 

«Биз қайта молиялашга сарфланган маблағларнинг қонуний асосларини ҳамда бу жараёнга МБ раҳбариятининг аралашувини текширамиз», — деб таъкидлаган коррупцияга қарши бюро раҳбари. 

Унинг қўшимча қилишича, етказилган зарар млрдлаб гривнани ташкил этиши мумкин. 

Аввалроқ, Украина Миллий банки раҳбари Валерия Гонтарева 2016 йилда 2,1 млн доллар даромад кўргани хақида хабарлар пайдо бўлган эди.