17 ёшли АҚШ фуқароси Сантос Колон, ўсмирлик чоғида Рим папаси Францискни ўлдиришга тайёрланганини тан олди. Бу ҳақда Америка адлия вазирлиги сайтида хабар қилинган. 

Унда айтилишича, Нью Жерси штатининг Линденуорлд шаҳрида истиқомат қилувчи америкалик ўзининг ғаразли ниятини 2015 йил сентябрида амалга оширмоқчи бўлган. Ўшанда, Рим папаси Пенсильвания штати Филадельфия шаҳрига ташриф буюриши керак эди. Унинг сўзларига кўра, Сантос 2015 йил 30 июнь-24 августгача бўлган оралиқда суиқасдни амалга ошириш хусусида ўйлаб юрган. 

Ўсмир портловчи моддаларни харид қилиб, қўлбола бомбаларни ясашни ҳамда шаҳар бўйлаб жойлаштириб чиқишни ўйлаган. Бундан ташқари, у Францискни ибодат вақтида ўлдириши лозим бўлган мерганни ҳам ёллашга уринган. Бироқ, у Федерал қидирув бюросининг яширин ходими бўлган. 2015 йилда ФҚБ Колонни қўлга олган.

АҚШ қонунчилигига кўра, унга 15 йилгача озодликдан маҳрум қилиш ҳамда 250 минг доллар жарима солиниши мумкин.