Япония Жанубий Корея билан талашаётган Токто оролларига японча номлар берди

Жаҳон 04 Апрель 2017 6300

Япония географик палатаси Жанубий Корея билан талашилаётган ва корейслар Токто, японлар Такэсима деб атовчи қояли ороллар гуруҳига 11та японча номни тасдиқлаган, — дея хабар берди Киодо агентлиги.

Агентлик маълумотларига кўра, икки асосий орол Ожима ("Эркак орол") ва Мэжима ("Аёл орол ") деб номланган, гарчи илгари ҳаттоки Японияда ҳам хариталарда улар корейсча "Ғарбий" ва "Шарқий" ороллар деган номлар билан белгиланар эди. 

Токто архипелагига японлар илк бор японча номлашни 2007 йилдаёқ қўллай бошлашган эди. Жанубий Кореянинг Ёнҳап агентлигининг хабарига кўра, 2012 йилда Жанубий Корея икки орол ўртасидаги денгиз қояларига ўз номини берган, бу эса японларнинг кескин эътирозига сабаб бўлган. Бунга жавобан японлар ўз топонимини ўйлаб топишган.

1905 йилда ороллар Такэсима номи остида Япония ҳудуди деб эълон қıлинган эди. Япония вазирлар маҳкамаси уни Симанэ префектураси таркибига қўшган. Иккинчи жаҳон уруши тугагач, архипелаг корейслар ихтиёрига ўтган ва айни пайтда Жанубий Корея томонидан назорат қилинмоқда. Сеул Япониянинг Токтога бўлган даъвосини инобатга олмайди ва уни асл корейс ерлари деб билади. Ҳозирча оролларга нисбатан японча янги номлар пайдо бўлганига Жанубий Корея ҳукумати реакция билдирмаган.

Эътиборлиси шундаки, оролларнинг қайта номланиши 9 апрель куни чақириб олган Япониянинг Сеулдаги элчиси Ясумаси Нагаминэнинг яна ўз ишига қайтган кунига тўғри келган. Элчининг чақириб олинишига Пусан шаҳрида Япония бош консуллиги биносининг рўпарасида Иккинчи жаҳон уруши йилларида япон аскарлари томонидан жинсий тажовузга учраган корейс аёлининг образли ҳайкали ўрнатилгани сабаб бўлган эди. 

Япония ва Жанубий Корея Осиё-Тинч океани минтақасида АҚШнинг энг яқин иттифоқчилари ҳисобланишади ва бу альянснинг тақдири Сеул ва Токио ўртасида азалдан таранглашиб келаётган муносабатларга ҳам боғлиқ.

Кўпроқ янгиликлар