Санкт-Петербург метросидаги портлаш шаҳарга мамлакат президенти Владимир Путин келган кунда рўй берди. Президентнинг матбуот котиби Дмитрий Песков маълум қилдики, ушбу тасодиф махсус хизматлар томонидан яхшилаб таҳлил қилинмоғи керак.

«Аниқки, бу террористик акт шаҳарда давлат раҳбари бўлиб турган вақтда рўй бергани диққатни тортади ва бу ҳақда ўйлашга ундайди. Буни махсус хизматлар яхшилаб таҳлил қилиши керак.

Мамлакатда содир этилган исталган террористик ҳаракат ҳар бир россиялик қатори президентга қарши қаратилган бўлади», - деган Песков.

Портлашдан кейиноқ Давлат думасининг собиқ депутати ва захирадаги ФСБ офицери Геннадий Гудков Би-би-си учун берган интервьюсида терактни Владимир Путин шаҳарга келгани билан боғлаганди.

3 апрель куни Санкт-Петербург метросининг «Технология институти» бекатига «Сенная площадь» бекатидан кириб келган поездда портлаш содир бўлди. 

Кейинроқ «Площадь Восстания» бекатида яна бир портловчи қурилма топилди - хабарларга кўра бу бомбанинг қуввати вагонда портлаганидан анча кўпроқ бўлган.

Охирги маълумотларга кўра, портлаш оқибатида 14 киши ҳалок бўлган, 49 киши жароҳатланган ҳолда шифохонага етказилган.

Владимир Путин портлаш вақтида Санкт-Петербург шаҳри яқинида Стрельнеда Умумроссия миллий фронти медиа-форумида иштирок этаётганди.

Шу куни у Беларусь президенти Александр Лукашенко билан учрашди.

Путин Петербург метросидаги портлаш қурбонлари хотирасига ҳурмат бажо келтирди

Айни вақтга келиб Қирғизистонда туғилган, 22 ёшда бўлган Акбаржон Жалилов ушбу теракт ижрочиси бўлгани расман маълум қилинди.