Шу йилнинг 4 апрель куни Ўзбекистон Республикаси Соғлиқни сақлаш вазирлиги билан Ўзбекистон фармацевтларининг Pharmclub.uz ҳамкорлигида давра суҳбати ташкил қилинди. Унда Ўзбекистон Соғлиқни сақлаш вазири Алишер Шодмонов ҳам иштирок этди. 

Вазирнинг сўзларига кўра, “бугунги кундаги ҳолат, вазият шундан иборат бўлганки, жуда кўп дориларимизни савдо-сотувида адолатсизликка, қонун бузилиш ҳолатларига йўл қўйилган. Бу чегарадан кириб келишдан бошлаб туриб, дори-дармонлар мамлакатга кирганидан кейин барчаси рўйхатдан, экспертизадан ўтиши керак бу қоидаларга ҳам ҳар доим риоя этилмаган ва энг муҳими, сотиш мобайнида ва нархларни белгилашда ҳеч қандай назорат бўлмаганлиги муносабати билан жуда кўп дори-дармонлар ўта қиммат нархда сотилиши ва аҳолининг ўринли эътирозларига олиб келди. Шундан келиб чиққан ҳолда, Президентнинг 2647 ва 2773 қарорларида аниқ вазифалар белгиланди”.

Шунингдек вазирнинг қайд этишича, аҳоли ҳаёти учун муҳим бўлган дориларнинг рўйхати қайта кўриб чиқилган. Шундан сўнг идоралараро комиссия билан биргаликда ўша дориларнинг энг оптимал, мувофиқ нархи белгиланган. Бу нархлар барча дорихоналарга тарқатилди. 

Бундан ташқари, таъкидланишича, давлат комиссияси ҳар чоракда ўз йиғилишини ўтказиб, маълум идораларнинг тавсияларига асосланиб туриб рўйхатни ва нархларни қайта кўриб чиқиши мумкин.