АҚШ президенти Дональд Трамп Петербург метросидаги теракт муносабати билан Россия президенти Владимир Путинга қўнғироқ қилиб, ҳамдардлик билдирди, деб хабар берди Путин матбуот котиби Дмитрий Песков.

Песковнинг айтишича, Россия ва АҚШ етакчилари террорчиликка қарши биргаликда курашиш кераклиги ҳақидаги фикрга келишган. Трамп Россия халқига мадад сўзларини етказиб қўйишни сўраган.

"Дональд Трамп Владимир Путин билан телефон мулоқотида Петербург метросида содир этилган ваҳший теракт оқибатида ҳалок бўлганлар яқинлари ва қариндошларига чуқур ҳамдардлик билдирди", деб айтди Песков.

Путин, ўз навбатида, америкалик ҳамкасбига миннатдорчилик билдирди ва у билан алоқаларни давом эттиришга келишиб олди.

Оқ уй матбуот хизмати, ўз навбатида, Трамп телефон мулоқотида Санкт-Петербургдаги терактни қоралагани ва ҳужумга алоқадорларни жавобгарликка тортишда ёрдам беришни таклиф қилганини маълум қилди.

Оқ уйнинг таъкидлашича, икки етакчи "террорчилик иложи борича тезроқ ва қатъиятлик билан мағлуб этилиши кераклиги ҳақидаги фикрга келишган".

Аввалроқ Трамп метродаги портлашни "даҳшатли ҳодиса" деб атаганди. 

Шунингдек, Франция президенти Франсуа Олланд ҳам Россия ҳалқига ҳамдардлик билдирди ва Франция Москванинг ёрдам ҳақидаги исталган илтимосига жавоб беришини айтди. Германия канцлери Ангела Меркель ҳужумни "кўрқоқларча ҳужум" ва "ваҳший акт" деб атади ҳамда теракт ташкилотчиларини топиб, жавобгарликка тортишга чақирди.

Терактда ҳалок бўлганлар хотирасига Петербургда 3 кунлик мотам эълон қилинди.