Буюк Британия, АҚШ ва Франция БМТ Хавфсизлик кенгаши аъзоларига Суриянинг Идлиб вилоятида кимёвий қурол қўллангани бўйича резолюция лойиҳасини тақдим этди. Бу ҳақда ТАСС агентлиги АҚШнинг ташкилотдаги махсус вакилига асосланиб хабар берган.

«Ўтган кечада БМТ Хавфсизлик кенгашида АҚШ, Буюк Британия ва Франциянинг 4 апрель куни Сурия Араб Республикасининг Хон-Шейхун шаҳрида кимёвий қурол қўллангани тўғрисидаги қўшма резолюцияси тарқатилди», — дейилган хабарда.

Делегациялар 5 апрель куни соат 17:00гача бу ҳужжатга ўз муносабатларини билдиришади. Соат 19:00да Хавфсизлик кенгашининг очиқ мажлиси бошланади.

«Газ ҳужуми» ҳақида 4 апрель куни маълум бўлди. Сурия инсон ҳуқуқлари обсерваторияси мухолифат томонидан назорат қилинадиган Хон-Шейхун шаҳрида камида 58 киши авиаҳужумлар чоғи заҳарловчи газ қўлланиши қурбони бўлгани ҳақида хабар берди.

Al Arabiya телеканалига кўра, ҳужум оқибатида 100 киши ҳалок бўлди ва 400 киши жабрланди.

Мухолифат мазкур ҳужумда ҳукумат ҳарбий-ҳаво кучларини айблади.

Ўз навбатида, расмий Дамашқ армия кимёвий қурол қўлламагани ва қўлламаслигини билдириб, айбловларни рад этмоқда.