ДНК таҳлили Акбаржон Жалилов шахсини тасдиқлади. У, тергов томони тахминига кўра, Петербург метросида портловчи қурилмани ҳаракатга келтирган. Бу ҳақда Тергов қўмитаси расмий вакиласи Светлана Петренко маълум қилди.

Акбаржон Жалилов шахсини унинг ота-онаси ҳам тасдиқлади. Ҳозирда, терговчилар террорчи экани тахмин қилинаётган гумондорнинг дўстлари ва атрофидаги одамларни аниқламоқда. 

"Ҳалок бўлганлардан сўнггилари Невнержицкая Мария, Красикова Юлия ва Мазанов Дмитрийларнинг шахсини тасдиқланган", — деб аниқлик киритган Петренко.

"Площадь Восстания" метро бекатида аниқланган қўлбола портловчи қурилма махсус экпертизага юборилган. Унда портловчи қурилманинг тури, кучи, зарар етказувчи элементлари ва бошқа жиҳатлари ўрганилади. 

Тергов қўмитаси вакиласининг айтишича, Жалилов уйини тинтув қилишда олинган ашёлар ҳам текширувга юборилади. 

"Дастлабки маълумотларга кўра, уларнинг иккиси ҳам "Площади Восстания" бекатида топилган қурилмадаги ашёларга ўхшаш, бироқ якуний хулосани экспертиза натижасидан сўнг бериш мумкин", — деган Петренко.

Санкт-Петербург метросидаги портлаш 3 апрель куни "Сенная площадь" ва "Технологический институт-2" бекатлари оралиғида рўй берди. Бунинг оқибатида 14 киши ҳаётдан кўз юмди. Тергов тахминига кўра, 22 ёшли Жалилов дастлаб "Площадь Восстания" бекатида яширинган қўлбола бомбани қолдирган, сўнгра вагонлардан бирида ўзини портлатиб юборган.