ОАВ томонидан Петербург метросидаги терактнинг эҳтимолий ташкилотчиси деб аталган россиялик Андрей (Илёс) Никитин уни террорчи сифатида “машҳур” қилиб юборишгани ҳаётига салбий кўрсатганини айтиб ўтди, деб хабар бермоқда IslamNews агентлиги.

«Суратим ОАВ томонидан эҳтимолий террорчи сифатида тарқатилганидан сўнг, мен полицияга бориб, бу ҳолатга ойдинлик киритиш ҳақида қарор қабул қилдим. Полицияда мени тўғри тушунишди ва барча айбловлар олинди. Бироқ бу воқеа ҳаётимни жуда қийинлаштириб юборди», - дея маълум қилди у.

Никитиннинг сўзларига кўра, куни кеча у уйига учиб кета олмаган, сабаби бошқа йўловчилар у билан бир рейсда парвоз қилишдан бош тортишган.

«Бунинг устига ишимдан айрилдим: бугун менинг иш берувчим ишдан бўшатилганим ҳақида хабар берди. У минтақавий тергов қўмитаси илтимосига асосланганини иддао қилди», - дея таъкидлаб ўтди Никитин.

3 апрель куни Санкт-Петербург метросининг «Технология институти» бекатига «Сенная площадь» бекатидан кириб келган поездда портлаш содир бўлди.  Кейинроқ «Площадь Восстания» бекатида яна бир портловчи қурилма топилди - хабарларга кўра бу бомбанинг қуввати вагонда портлаганидан анча кўпроқ бўлган. Портлаш оқибатида 14 киши ҳалок бўлган, 49 киши жароҳатланган ҳолда шифохонага етказилган.