Бухоролик Фарҳодбек Мўминов (исм-фамилиялар ўзгартирилган) 29 ёшида, яъни 2015 йилнинг февраль ойида эзгу ният билан тадбиркорликка қўл урди. Тегишли тартибда рўйхатдан ўтиб, озиқ-овқат ва қурилиш маҳсулотлари улгуржи савдосига ихтисослашган “Sintez Savdo” масъулияти чекланган жамиятини таъсис этди, деб ёзади “Ҳуқуқ” газетаси.

Дастлабки фаолиятини бошлаш учун Ф.Мўминов пул ўтказиш йўли билан 1 млрд. 379 млн. 300 минг сўмлик турли озиқ-овқат маҳсулотлари ва қурилиш материаллари харид қилиб, ишни бошлади. Савдодан тушаётган пулларни кўрган Ф.Мўминовнинг фикри ўзгарди. Нияти бузилиб, уч ой давомида пул ўтказиш йўли билан МЧЖга кирим қилинган маҳсулотларни нақд пулга сотиб юборди. Пулларни эса на назорат-касса машинасидан ўтказди, на банкдаги ҳисоб рақамига топширди.

Орадан маълум вақт ўтгач, Ф.Мўминов “қор ёғиб, излар ёпилди”, деган хаёлга борди, шекилли, банкдаги ҳисоб рақамидан пул ўтказиш йўли билан яна 1 млрд. 917 млн. сўмликдан ортиқ озиқ-овқат маҳсулотлари ва қурилиш материаллари сотиб олди. Бу сафар ҳам савдодан тушган пуллар банкка кирим қилинмай, МЧЖ раҳбарининг манфаатлари йўлида сарфланди. Йил якунида МЧЖнинг фаолияти ДСИ ходимлари томонидан текширилганида Ф.Мўминовнинг яна бир жинояти фош этилди. Маълум бўлишича, у МЧЖнинг ўта муҳим аҳамиятга эга бўлган, қатъий ҳисобда турувчи бирламчи бухгалтерия ҳужжатларини йўқ қилиб юборган экан.

Текширишлар жараёнида “уддабурон” тадбиркорнинг қонунбузарликлари бирин-кетин юзага қалқиб чиқди. Пировардида унга нисбатан жиноий иш қўзғатилди...

Суд ишни атрофлича ва холисона кўриб чиқиб, Ф.Мўминовга уч йил муддатга ахлоқ тузатиш ишлари жазоси тайинлади.