Саудия Арабистонининг ҳаж ва умра вазири Муҳаммад Солиҳ ибн Тоҳир Эроннинг ҳаж ва зиёратчилик ташкилоти бошлиғи Ҳамид Муҳаммадий ва у бошчилигидаги делегацияни қабул қилди. Бу ҳақда Саудия Арабистонининг SPA ахборот агентлиги хабар бермоқда. 

Эрон делегацияси Маккада Саудия Арабистони ҳукумати билан ҳаж масалаларини муҳокама қилгани ташриф буюрди. 

Учрашув Тоҳирнинг Маккадаги маъмуриятида бўлиб ўтди ва ҳаж вақтида хавфсизлик, зиёратчиларнинг келиши, ташилиши ва жойлаштирилиши масалаларига бағишланди.  

Аввалроқ Эрон маданият ва ислом ориентацияси вазири Ризо Солиҳий Амирий Эрон агар Саудия Арабистони эронлик зиёратчиларнинг хавфсизлигини таъминласа ва 2015 йилда Мино водийсидаги тиқилинчда ҳалок бўлган эронликлар учун товон пули тўласа жорий йилда ҳажга зиёратчиларни юборишга тайёрлигини маълум қилганди. 

Агар икки томон келишувга келсалар, унда эронлик зиёратчиларни Маккага юборишда муаммолар бўлмайди, деб айтган Амирий.