БМТнинг Болалар ташкилоти (ЮНИСЕФ) Суриянинг Идлиб вилоятидаги Хон-Шайхун шаҳридаги кимёвий ҳужум оқибатида камида 27 нафар бола ҳалок бўлганини тасдиқлади. Бу ҳақда ташкилот сайтида маълум қилинган.

«Сурия шимоли-ғарбидаги Идлибда кимёвий ҳужум оқибатида камида 27 бола ҳалок бўлгани тасдиқланди», — дейилган хабарда.

ЮНИСЕФ маълумотига кўра, ушбу ҳужум оқибатида яна 557 киши, жумладан, кўплаб болалар заҳарланган.

Фонд вакилларининг қўшимча қилишича, қурбонлар сони ҳали янада кўпайиши мумкин.

Шифокорлар беморларда кузатилган белгиларга қараб, зарин заҳарли гази ишлатилган бўлиши мумкинлигини тахмин қилишмоқда. Заҳарланган кишилар нафаси қисилиб, оғиздан кўпик келиш ва қайт қилиш ҳолатлари кузатилган. Зарин заҳарли моддаси 2013 йилда Ғута шаҳрида ҳам ишлатилган бўлиб, БМТ тергов комиссияси ҳужум учун жавобгарликни Башар Асад ҳукуматини айбдор деб топганди.

Эслатма. Кимёвий қуролдан фойдаланиш уруш жиноятлари сирасига киради. Сурия ҳукумати 2014-2015 йилларда ҳам кимёвий қуролдан фойдаланишда айбланганди. Шундан сўнг, Франция ва Буюк Британия БМТ Хавфсизлик Кенгашига Сурияга вертолётлар сотишни тақиқлаш ва суриялик юқори лавозимли ҳарбийларга қарши санкция жорий қилишни таклиф қилган.