Жорий йилнинг апрель ойида Тошкентда Мариинский театри бадиий раҳбари ва Мюнхен филармония оркестри бош дирижёри Валерий Гергиев ва Владимир Спиваков бошчилигидаги Россия Миллий филармония оркестри концерт беради. 

Валерий Гергиевнинг чиқиши 13 ва 14 апрелга режалаштирилган. Унинг раҳбарлигидаги Мариинский театри симфоник оркестри концерти “Ўзбекистон” халқаро форумлар саройида 13 апрель куни бўлиб ўтади. Кечада ўзбекистонлик пианиночи Беҳзод Абдураимов ҳам саҳнага чиқади. У Сергей Прокофьев оркестри билан фортепиано учун 3-рақамли Концертни ижро этади.

Мариинский театри бош балеринаси Диана Вишнёва эса Алишер Навоий номидаги Давлат академик Катта театри саҳнасида 14 апрель куни чиқиш қилади. Кеча дастурида – Жорж Бизе-Родион Шедриннинг бир актли «Кармен-сюита» балети. Шунингдек, Мариинский театри балет труппаси яккахонлари «Дон-Кихот», «Лебединое озеро», «Анна Каренина», «Шаҳризода» спектакллари ва бошқа балетлардан саҳна кўринишлари ҳамда хореографик дастурлар билан чиқиш қилишади.

Владимир Спиваков бошчилигидаги Россия Миллий филармония оркестри эса “Ўзбекистон” халқаро форумлар саройи саҳнасида 26 апрель куни чиқиш қилади.

Бир саҳнада Москванинг энг етакчи опера театрлари яккахонлари Анна Аглатова (сопрано) ва Василий Ладюк (баритон), шунингдек дастурнинг махсус меҳмони, Ўзбекистон халқ артисти Рамиз Усмоновлар (тенор) куйлашади.

Классик санъат кечалари томошабинларни Россиянинг етакчи театрлари санъати билан таништириш мақсадида, Ўзбекистон Республикаси Маданият вазирлиги ва Алишер Усмоновнинг «Санъат, фан ва спорт» хайрия жамғармаси кўмагида ташкил этилади.