Бугун Ўзбекистонда биринчи марта Халқаро Пресс-клуб (ХПК) фаолиятига старт берилди. ХПК мамлакат иқтисодий, ижтимоий ва сиёсий ҳаётидаги ўзгаришлар ҳақидаги  объектив ахборотни кенг халқаро жамоатчиликка етказишни мақсад қилган. 

Халқаро Пресс-клуб вазифаларига қуйидагилар киради:

- давлат бошқарув органлари, экспертлик ҳамжамияти вакиллари, чет эл ва маҳаллий мутахассислар билан оммавий ахборот воситалари иштирокида мавжуд муаммоларни муҳокама қилиш, илғор халқаро тажрибаларни тадбиқ этиш ва муаммоларни ҳамкорликда ҳал қилиш йўлларини ишлаб чиқишга қаратилган муқобил мулоқот майдонини шакллантириш;

- давлат, фуқаролик жамияти ва ОАВ ўртасидаги очиқ мулоқот асосида мамлакатнинг ижобий имиджи ва брендингини мустаҳкамлашга кўмаклашиш;

- Ўзбекистондаги қулай инвестицион иқлимни шакллантиришва сақлаб қолиш, хорижий инвестицияларни кенг жалб қилишга қаратилган ислоҳотлар мазмун-моҳиятини очиб бериш;

- мамлакат аҳолиси ва халқаро жамоатчилик орасида долзарб вазифаларни муҳокама қилиш, жамоатчилик фикри асосида учрашув ҳамда мулоқотлар мавзуси ва иштирокчилар қатламини тўғри белгилаган ҳолда мақбул ахборот фонини шакллантиришда қатнашиш.

Ташкилотчиларнинг таъкидлашига кўра, Халқаро Пресс-клубда мансабдор шахслар, вазирлик ва идоралар раҳбарлари, мутахассислар иштирокида йиғилишлар, панел дискуссиялари ва маҳорат дарсларини ташкил этади. Мавзулар кўлами: Халқ қабулхоналари фаолияти натижалари, Ўзбекистон ташқи сиёсати, инсон ҳуқуқлари ҳимояси, ҳаракатлар стратегиясини тадбиқ қилиш. 

Шунингдек ХПКда Ўзбекистонга ташриф буюрадиган хорижий делегациялар, нуфузли халқаро ташкилотлар ва расмий доира вакиллари иштирокида медиа-учрашувлар ташкил этилади. 

Халқаро Пресс-клуб раиси этиб Мирзо Улуғбек номидаги Ўзбекистон Миллий Университети журналистика факультети кафедра мудири Шерзод Қудратхўжаев сайланди