Россия президенти Владимир Путин америкаликларнинг Сурия армиясига ракета зарбалари йўллашини бу мамлакат суверенитетини бузиш деб ҳисоблайди. Президент матбуот котиби Дмитрий Песковнинг маълум қилишича, бу ҳужум Россия ва Америка муносабатлари ёмонлашувига олиб келиши мумкин.

«Президент Путин Сурия бўйлаб Америка зарбаларини ўйлаб чиқилган важ остида халқаро ҳуқуқ нормаларини бузган ҳолда суверен давлатга қарши тажовуз деб ҳисоблайди», — деган Песков.

У Сурия армияси кимёвий қуроллар захирасига эга эмаслигини таъкидлаган.

«Сурия қуролли кучларининг барча кимёвий қурол захиралари йўқ қилингани факти БМТ ихтисослаштирилган бўлинмалари томонидан тасдиқланган эди», — дея эслатиб ўтган матбуот котиби.

Путин бу ҳужум терроризмга қарши кураш йўлида навбатдаги тўсиқларни келтириб чиқаришини айтиб ўтган.

Унинг фикрича, АҚШ Қуролли кучларининг Суриядаги ҳаракати шусиз ҳам заиф ҳолда бўлган Россия-Америка муносабатларига зарба бўлади.

7 апрелга ўтар кечаси АҚШ Хомс провинциясидаги Сурия ҲҲК аэродромига зарба берди. Пентагон маълумотларига кўра, авиабаза ҳудудига қарата 59 та Tomahawk қанотли ракетаси учирилган.

Сурия армияси мухолифат томонидан Идлибдаги кимёвий ҳужумни амалга оширишда айбланди. Расмий Дамашқ бу айбловни қатъиян рад этди.

Сурия президенти Башар Асад ҳам расман бу айбловни рад қилган ва 2013 йили Дамашқ ўзининг кимёвий омборларини йўқ қилганини эслатган. 2016 йилнинг январида Кимёвий қуролларни тақиқлаш бўйича ташкилот (бу ташкилот 2013 йили Суриянинг кимёвий қуролдан холи қилингани учун Нобель мукофотини олганди) Сурияда кимёвий қуроллар арсенали йўқ қилингани ҳақида эълон қилганди.