Kreml: AQShning Suriyaga raketa zarbasi - Moskva va Vashington munosabatlariga berilgan zarbadir

Rossiya prezidenti Vladimir Putin amerikaliklarning Suriya armiyasiga raketa zarbalari yo‘llashini bu mamlakat suverenitetini buzish deb hisoblaydi. Prezident matbuot kotibi Dmitriy Peskovning ma'lum qilishicha, bu hujum Rossiya va Amerika munosabatlari yomonlashuviga olib kelishi mumkin.

«Prezident Putin Suriya bo‘ylab Amerika zarbalarini o‘ylab chiqilgan vaj ostida xalqaro huquq normalarini buzgan holda suveren davlatga qarshi tajovuz deb hisoblaydi», — degan Peskov.

U Suriya armiyasi kimyoviy qurollar zaxirasiga ega emasligini ta'kidlagan.

«Suriya qurolli kuchlarining barcha kimyoviy qurol zaxiralari yo‘q qilingani fakti BMT ixtisoslashtirilgan bo‘linmalari tomonidan tasdiqlangan edi», — deya eslatib o‘tgan matbuot kotibi.

Putin bu hujum terrorizmga qarshi kurash yo‘lida navbatdagi to‘siqlarni keltirib chiqarishini aytib o‘tgan.

Uning fikricha, AQSh Qurolli kuchlarining Suriyadagi harakati shusiz ham zaif holda bo‘lgan Rossiya-Amerika munosabatlariga zarba bo‘ladi.

7 aprelga o‘tar kechasi AQSh Xoms provinsiyasidagi Suriya HHK aerodromiga zarba berdi. Pentagon ma'lumotlariga ko‘ra, aviabaza hududiga qarata 59 ta Tomahawk qanotli raketasi uchirilgan.

Suriya armiyasi muxolifat tomonidan Idlibdagi kimyoviy hujumni amalga oshirishda ayblandi. Rasmiy Damashq bu ayblovni qat'iyan rad etdi.

Suriya prezidenti Bashar Asad ham rasman bu ayblovni rad qilgan va 2013 yili Damashq o‘zining kimyoviy omborlarini yo‘q qilganini eslatgan. 2016 yilning yanvarida Kimyoviy qurollarni taqiqlash bo‘yicha tashkilot (bu tashkilot 2013 yili Suriyaning kimyoviy quroldan xoli qilingani uchun Nobel mukofotini olgandi) Suriyada kimyoviy qurollar arsenali yo‘q qilingani haqida e'lon qilgandi.