Россия президенти матбуот котиби Дмитрий Песков маълум қилдики, Қўшма штатлар Суриядаги авиабазага ракета зарбалари бериш орқали бу ҳудуд осмонида Россия ҳамда АҚШ самолётлари тўқнашиши хавфини кескин оширди.

«Ракета зарбалари берилиши фонида айтиш мумкинки — тўқнашувлар рўй бериши хавфи ортди», — деган Песков шу борада берилган саволга жавобан.

Бугун Россия ва АҚШ ўртасида Сурия бўйлаб парвозлар хавфсизлиги тўғрисидаги меморандум амалиёти тўхтатилди.

Мазкур ҳужжат Россия ва АҚШ авиацияси ўртасида юз бериши мумкин бўлган тўқнашувларнинг олдини олишга қаратилганди.

7 апрелга ўтар кечаси АҚШ Хомс провинциясидаги Сурия ҲҲК аэродромига зарба берди. Пентагон маълумотларига кўра, авиабаза ҳудудига қарата 59 та Tomahawk қанотли ракетаси учирилган.

Ракета зарбаси 4 апрель куни Суриянинг Идлиб провинциясида кимёвий қуролдан фойдаланилгани учун жавоб бўлди. АҚШ раҳбарияти тахмин этилаётган кимёвий ҳужум ушбу аэродромдан бошланган, деб ҳисоблайди.

Охирги маълумотларга кўра, ушбу ҳужум оқибатида 7 киши ҳалок бўлган, 7 киши жароҳатланган ва 7та самолёт йўқ қилинди.