Мексикада асосан жиноий гуруҳлар ҳаракатлари оқибатида бедарак йўқолганлар сони 2016 йил охирига келиб деярли 30 минг кишини ташкил қилди. Бу ҳақда Мексиканинг инсон ҳуқуқлари бўйича миллий комиссияси маълум қилди.  

2013 йил охирида бу кўрсаткич 26 минг кишини ташкил қилганди.

"Ўғирланганлар ёки бедарак йўқолганларнинг миллий рўйхатида 2016 йил октябрь ҳолатига кўра, 29,9 минг ҳолат маълум қилинган. Улардан 82,71 фоизи 11 штатга тўғри келмоқда", дейилган комиссиянинг твиттердаги хабарида. 

Одамларнинг энг кўп миқдорда бедарак йўқолиши Тамаулипас штатида қайд қилинган. Бу штат АҚШга яқинлиги сабабли зўравонлик даражаси юқорилиги билан ажралиб туради. Ҳозирда бу штатда 5,5 мингдан кўпроқ одам бедарак йўқолган деб ҳисобланмоқда. Одамлар йўқолиши бўйича 2- ва 3-ўринни Мехико (2,9 мингдан кўпроқ) ва Халиско (2,5 мингдан кўпроқ) штатлари эгалламоқда.

Комиссия, шунингдек, охирги 10 йил ичида мамлакатда 855 та яширин қабр аниқлангани ва у ердан 1,5 минг кишининг суяклари чиқариб олинганини маълум қилди. Жасадлардан 800 нафарининг кимга тегишли экани аниқланган.