Анқара томони АҚШнинг Суриядаги авиабазага қилган ҳужумини маъқуллади ва «Башар Асад режимини жазолашга қаратилган кейинги қадамларни ҳам қўллаб-қувватлаш»ни ваъда қилди. Бу ҳақда Туркия ТИВ баёнотида айтиб ўтилган.

«Биз АҚШнинг Шайрат авиабазасига уюштирган ҳарбий амалиётини яхши баҳолаймиз. Туркия ушбу режим жиноятларига қарши қаратилган навбатдаги қадамларни ҳам қўллаб-қувватлайди», дейилган Туркия ТИВ баёнотида

Шунингдек, Туркия томонидан Сурияда парвозлар учун хавфсиз ҳудуд ташкил этишга чақирилган.

6 апрель, пайшанба куни АҚШ қуролли кучлари президент Дональд Трамп буйруғи билан Суриянинг Хомс провинциясидаги ҳарбий аэродромга қарата 59 та қанотли Tomahawk ракеталарини учирди. Ракета зарбаси 4 апрель куни Суриянинг Идлиб провинциясида кимёвий қуролдан фойдаланилгани учун жавоб бўлди. АҚШ раҳбарияти тахмин этилаётган кимёвий ҳужум ушбу аэродромдан бошланган, деб ҳисоблайди.

Хомс губернатори Талал Баразий АҚШ зарба берган авиабаза Сурия армияси томонидан ИШИДга қарши курашиш учун фойдаланилганини айтиб ўтди.

Охирги маълумотларга кўра, ушбу ҳужум оқибатида 7 киши ҳалок бўлган, 7 киши жароҳатланган ва 7та самолёт йўқ қилинди.