WhatsApp пул ўтказмалари хизматини ишга туширмоқчи. Ҳозирча фойдаланувчилардан ушбу хизмат учун олинадиган ҳақ ва бу хизматнинг бутун дунё бўйлаб жорий қилиниши ҳақида ҳеч нарса маълум эмас. Тахмин қилинишича, WhatsApp UPI банклараро тўлов тизими негизида ишлайди.

Ҳозирда дастур 1,2 млрд дан кўпроқ фойдаланувчига эга. Бу улкан базадан фойдаланиб, қандайдир йўсинда даромад олиш керак. Дастур учун аввал 1 доллар миқдорида йиллик обуна тўлови олинган. 2016 йилда дастур фойдаланувчиларининг кўпайишида тўсиқ сифатида бу тўлов бекор қилинган. Даромад олишнинг бошқа йўли эса пул тўловларидан ҳақ олишдир. Компанияда айнан шу усулдан фойдаланишга қарор қилинди.

Дастурнинг пул тўловлари хизмати ишга тушириладиган илк майдонча Ҳиндистон бўлади. Бу ерда рақамли тўловлар оммалашган ва WhatsApp’дан 200 млн киши фойдаланади. Ҳиндистон Захира банки маълумотларига кўра, 2016 йил январда турли рақамли тўлов хизматлари орқали 1,3 млрд доллар пул ўтказилган. Мессенжернинг тўлов хизмати ярим йилдан кейин ишга туширилади.