Германия қуролли кучлари (Бундесвер) АҚШнинг Сурия ҳукумат қўшинлари позицияларига янги зарбалар беришида иштирок этмайди. Бу ҳақда Германия мудофаа вазири Урсула фон дер Ляйен SWR радиостанцияси эфирида маълум қилди. 

Фон дер Ляйеннинг айтишича, Бундесвер олдига Ғарб коалициясининг ИШИД террорчилик гуруҳига қарши кураши давомида разведка олиб бориш вазифаси қўйилган. "Мен таъкидлаб ўтмоқчиман, ИШИДга қарши кураш доирасида. Бу мутлақ ойдин вазифа ва биз унинг доирасида ҳаракат қиламиз", деб айтган фон дер Ляйен.

Вазирнинг айтишича, бу вазифа Сурияда кимёвий қурол қўлланиши масаласи ва Башар Асад фаолиятига алоқаси йўқ.

ИШИДга қарши Ғарб коалицияси операциясида немис ҳарбий мутахассислари НАТОнинг AWACS радиолокацион разведка самолётлари экипажини шакллантириш билан машғуллар. Берлин, шунингдек, Туркиядаги Инжирлик базасида жойлаштирилган 6 та "Торнадо" разведкачи самолёти билан кўмак кўрсатади. Бундан ташқари, Бундесвер инструкторлари ироқлик курдларни ўқитадилар.