Ироқ бош вазири Ҳайдар ал Ободий АҚШ вице-президенти Майкл Пенс билан ўтказган телефон орқали мулоқотида Суриядаги зўравонликларга чек қўйиш зарурлигини қайд этди. Бош вазир котибияти шу ҳақда маълум қилди. 

"Бош вазир Сурияда зўравонликларга барҳам бериш бўйича комплекс режа ишлаб чиқиш ва ИШИД гуруҳи ҳамда бошқа террорчилик тузилмаларини йўқ қилиш учун саъй-ҳаракатларни бирлаштириш ҳақида сўз юритди", - дейилади хабарда. 

Сурияда вужудга келган вазият хусусида фикр билдирган ал Ободий "Ироқ Сурияда кимёвий қурол қўлланилганини қоралаб, уни жиноят сифатида баҳолаган". 

4 апрель куни Reuters агентлиги "Инсон ҳуқуқларини мониторинг қилиш бўйича Сурия маркази" (The Syrian Observatory for Human Rights)га таянган ҳолда, Идлиб вилоятининг Хон Шайхун шаҳрида кимёвий қурол қўлланилгани, унда 58 киши, шу жумладан 11 бола ўлгани ҳақида хабар қилган эди. 

АҚШ ҲДКнинг Ўрта ер денгизидаги икки кемаси президент Дональд Трамп буйруғи асосида 6 апрель тунда 59та қанотли Tomahawk ракеталари билан Сурия авиабазасига зарбалар берди.