АҚШ 7 апрелга ўтар кечаси Суриядаги Шайрат аэродромига ракета зарбаси берди. Ҳужум оқибатида 7 киши: 5 ҳарбий ва 2 фуқаро ҳалок бўлган. Аэродромнинг яна 6 нафар ходими жароҳатлар олган. 

Қурбонлар борлигига қарамасдан, АҚШ президенти Дональд Трампнинг қизи Иванка Трамп бу зарбадан кейин отаси билан фахрланишини айтган.

"Биз яшаётган давр мураккаб ечимлар қабул қилинишини талаб қилади. Мен отам инсониятга қарши бу даҳшатли жиноятларга кўнишни истамаганидан фахрланаман", деб ёзган Иванка твиттерда.

Трампнинг қизи "даҳшатли жиноятлар" деганда Идлиб вилоятидаги кимёвий ҳужумни назарда тутган. АҚШда бу ҳужум Шайрат базасидан амалга оширилгани таъкидлаб келинмоқда.

Бироқ ушбу фожиага ҳақиқатан ким айбдорлиги БМТ ва Кимёвий қуролни тақиқлаш ташкилоти томондан тергов қилинмоқда. Ҳозирча мутахассислар ҳеч қандай хулосаларга келишмаган.