Грецияда 2016 йилда даромад жуда кам бўлгани боис ҳар учинчи фуқаро ҳеч қандай солиқ тўламагани маълум бўлди. Бу ҳақида мамлакат Молия вазирлиги маълумотларига асосланиб, "Вима" газетаси хабар берди. 

Гап солиқлардан бўйин товлашдами ёки Грециядаги уй хўжаликлари кўп йиллик инқироз сабаб ҳақиқатда даромадларини йўқотишдими - масала шунда. 

Нашр маълумотларига кўра, Молия вазирлиги 2016 йилда 8 645 596 солиқ декларациясини қайта ишлаган. 

"10 кишидан 9 нафари 20 минг евродан кам бўлган даромадни қайд этган, солиқ тўловчиларнинг 31,8 фоизи эса, умуман ҳеч қандай солиқ тўламаган", - деб ёзади газета. 

2015 йилда даромад 73,9 миллиард евро бўлган бўлса, 2016 йилда бу кўрсаткич 74,2 миллиардни ташкил қилди. Шунга қарамай, ўртача солиқ 3 фоизга ошган бир вақтда ўртача даромад 1,1 фоизга камайди.

Греция фуқаролари 2016 йилда 8,2 миллиард евро, 2015 йилда эса - 7,8 миллиард евро ҳажмдаги кирим учун солиқ тўлашган. 2016 йилда даромаднинг умумий суммаси 2015 йилга нисбатан 400 миллион еврога ошган, солиқлар эса янада ўсган.

2016 йилги декларацияларнинг кўрсатишича, солиқ тўловчиларнинг 14,6 фоизи ёки 1,263 миллион киши ҳеч қандай даромад олмагани маълум бўлган. Бу, қоидага кўра - болалар, талабалар, уй бекалари. 32 фоиз аҳоли ёки 2,767 миллион киши 5 минг евродан кам бўлган даромадга эга эканини маълум қилган ва табиийки, улар ҳам солиқ тўлашмаган. 

Шунингдек сўнгги беш йилда ойига минг евродан кам даромад олувчи кишилар сони 49 фоиздан 64,11 фоизга ўсган.