Мисрнинг Искандария шаҳридаги черковда содир этилган портлаш оқибатида 8 киши ҳалок бўлди ва 60 киши жароҳатланди. Бу ҳақда Миср Соғлиқни сақлаш вазирлигига асосланиб Reuters агентлиги хабар тарқатган.

Маълум қилинишича, худкуш террорчи полиция пайқаб қолгач, ўзини черков эшиги олдидаёқ портлатиб юборган ва бу қурбонлар сони кўп бўлишининг олдини олган.

ОАВнинг айтишича, у коптларнинг патриархи Теодор Иккинчини ўлдиришни мақсад қилганди. Патриарх портлаш рўй беришидан олдинроқ бинони тарк этишга улгурган ва жароҳатланмаган.

Қайд этиш керакки, бу Мисрда бугун содир этилган иккинчи йирик теракт бўлди. Бундан аввалроқ Танта шаҳридаги Мар-Гиргис шаҳрида худкуш террорчи ўзини портлатгач, 30 киши ҳалок бўлган ва 40дан ортиқ киши жароҳатланганди.

Ҳозирча ушбу портлашлар учун жавобгарликни ҳеч бир ташкилот ўз зиммасига олмади.