Андижон вилояти Олтинкўл тумани Сувюлдуз қишлоғидаги Исломобод маҳалласида уюшмаган аҳоли билан ишлашда давлат ва жамоат ташкилотлари ҳамкорлигига бағишланган кўргазмали семинар бўлиб ўтди.

19-умумтаълим мактабида ташкил этилган семинарда тумандаги тижорат банклари бўлимлари, агрофирмалар, бандликка кўмаклашиш ва ягона дарча марказлари, тиббиёт, соғлиқни сақлаш бўлимлари раҳбарлари, маҳалла фуқаролар йиғинлари раислари ҳамда ҳудуддаги ишсиз ёшлар иштирок этдилар. Тўпланган тажрибани оммалаштириш учун шаҳар ва туман ҳокимларининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосарлари таклиф этилди.

Тадбир иштирокчиларини туман ҳокими Бахтимурод Каримов қутлаб, мавзу доирасида амалга оширилаётган ишларга тўхталди. Бандликни таъминлашга алоқадор ташкилотлар мутахассислари ҳар бир хонадонда тадбиркорликни ривожлантириш, иссиқхоналар ташкил этиш, паррандачиликни йўлга қўйиш масалаларида тушунтириш ва маслаҳатлар бердилар. 120 нафар ишсиз ёшлар билан бирма-бир суҳбатлашилди. Касбий кўникмалари, мавжуд имкониятлардан келиб чиқиб тегишли ёрдам кўрсатилди.

Гарчи 120 нафар ёшнинг барчаси бирдан ишли бўлмаган бўлса-да, уларнинг кўнглида тадбиркорлик қилиш, мамлакат Президенти ташаббуси билан бошланган умумхалқ ҳаракатида ўзининг муносиб ўрнини топиш мақсади пайдо бўлди.

Тадбир доирасида спорт мусобақалари, бадиий чиқишлар, тиббий кўрик, турли кўргазмалар ташкил этилди. Унинг аввалида эса маҳалладаги 6 нафар ёшга Ўзбекистон фуқароси паспорти, шунингдек, турли мусобақаларда ғолибликни қўлга киритган мактаб ўқувчиларига дипломлар тантанали равишда топширилди.

Элмурод Эрматов, Андижон