Ўзбекистон Вазирлар Маҳкамаси "Тадбиркорлик субъектларининг электр тармоқларга уланишлари тартибини янада такомиллаштириш бўйича қўшимча чора-тадбирлар тўғрисида"ги қарор лойиҳасини ишлаб чиқди.

Бу қонун лойиҳасидан асосий мақсад тадбиркорлик субъектларининг электр тармоқларга уланишда бевосита иштирокларини талаб қилувчи жараёнлар сонининг қисқартирилиши ҳамда ҳудудий электр тармоқлари корхоналари (ҲЭТК) томонидан тегишли хизматларни кўрсатиш жараёнлари ва муддатларининг очиқ-ойдинлиги ва уларга амал қилинишини таъминлашдан иборат.

Лойиҳага Тадбиркорлик субъектларини электр тармоқларга улаш тартиби ҳақидаги низом ҳам киритилган. Лойиҳа 2017 йил 1 майда тасдиқланиши мумкин. Ҳужжатда қуйидагилар кўзда тутилган:

тадбиркорлик субъектлари электр тармоқларига уланиш учун аризаларни "ягона дарча" марказларига келган ҳолда ва Ягона интерактив давлат хизматлари портали орқали электрон кўринишда берадилар; 

"ягона дарча" марказлари ҲЭТКдан техник шартлар, ҳисоб-монтаж схемаси, трасса схемаси, манфаатдор лицензиялаштирилган ташкилотлардан лойиҳалаштириш, қурилиш-монтаж ва ишга тушириш-созлаш ишларини ўтказишга хизматлар кўрсатишга тижорий таклифлар ва лойиҳа шартномаларини олиб, уларни ариза берувчиларга топширади;

ташқи электр таъминоти лойиҳаларининг келишилиши ва ташқи электр таъминоти тармоқларининг фойдаланишга қабул қилиниши ҲЭТК ва "Ўздавэнергоназорат" инспекциялари томондан "ягона дарча" марказлари орқали берилган аризаларга кўра амалга оширилади;

адлия идоралари ва прокуратуралар тадбиркорлик субъектларининг электр тармоқларга уланишлари муддатлари ва жараёнларини "ягона дарча" марказлари томонидан тақдим қилинадиган маълумотлар асосида назорат қиладилар;

ҲЭТКлар тадбиркорлик субъектларини электр тармоқларга улаш бўйича лойиҳалаштириш, қурилиш-монтаж ва ишга тушириш-созлаш ишларини ўтказиш ҳуқуқини оладилар.

Лойиҳага кўра, хизматларни амалга оширишнинг умумий муддати 7 иш кунидан ошмаслиги керак.