Jizzax shahridagi Xalqlar do‘stligi shoh ko‘chasiga Islom Karimov nomi berildi

Jizzax shahridagi “Xalqlar do‘stligi” shoh ko‘chasi endi O‘zbekiston Respublikasining Birinchi Prezidenti Islom Karimov nomi bilan ataladi. Bu haqda O‘zbekiston Respublikasi yer resurslari, geodeziya, kartografiya va davlat kadastri davlat qo‘mitasi geodeziya va kartografiya milliy markazi qoshidagi ekspert komissiyasi bergan xulosada ma'lum qilindi, deb xabar bermoqda Jizzax viloyati hokimligi axborot xizmati.

Eslatib o‘tamiz, O‘zbekiston Prezidenti Shavkat Mirziyoyev tomonidan 2017 yil 25 yanvar kuni imzolangan “O‘zbekiston Respublikasining Birinchi Prezidenti Islom Abdug‘aniyevich Karimovning xotirasini abadiylashtirish to‘g‘risida”gi qarorga muvofiq Qoraqalpog‘iston Respublikasi, Toshkent shahri va viloyatlardagi markaziy ko‘chalarga (mahalliy davlat hokimiyati organlari takliflari asosida) Islom Karimov nomini berish belgilab qo‘yilgan edi.