Корея республикаси прокуратураси терговчилари мамлакатнинг собиқ давлат раҳбари Пак Кин Хени бешинчи марта сўроқ қилишни бошлади. Бу ҳақда республика Бош прокуратураси маълум қилмоқда. 

"Сўроқ қилиш 09:15 (Тошкентда 05:15)да Сеул вақтинча ҳибсда сақлаш маркази биносида бошланди. Пак Кин Хе 31 мартдан буён шу ерда сақланмоқда. Аввалроқ, собиқ президентни 4,6,8 ва 10 апрель кунлари ҳам сўроқ қилишган эди", - дейилади прокуратура сайтида жойланган қисқа хабарда. 

Айтиш жоизки, аввалги сўроқлар натижаси ҳақида ҳеч нарса маълум эмас. Корея ОАВ эса Пак Кин Хе ўзига нисбатан илгари сурилган 13 банддан иборат барча айбловларни кескин рад этгани ҳақида хабарлар тарқатганди. 

Хусусан, собиқ президент порахўрлик, ҳокимиятни суиистеъмол қилиш, таъмагирлик мақсадида тил бириктириш, давлат сирини ошкор қилишда айбланмоқда. Келаси ҳафта охирида якунланиши керак бўлган тергов давомида уни яна бир неча марта сўроққа тутишлари мумкин. Агар, суд собиқ давлат раҳбарини айбдор деб топса, унга 10 йилдан 45 йилгача қамоқ жазоси тайинлаши мумкин.