Оқ уй расмий вакили Шон Спайсер журналистлар учун ўтказган брифингиада ноқулай аҳволга тушиб қолди. У Ҳитлер ҳам кимёвий қуролдан фойдаланиш каби пасткашликка бормаганини айтди. 

"Биз ҳатто кимёвий қуролдан Иккинчи жаҳон урушида ҳам фойдаланганимиз йўқ… Ҳитлер ҳам кимёвий қуролдан фойдаланиш даражасига тушмаган", — деган Спайсер ва Идлибдаги кимёвий ҳужумда Сурия ҳукумати ва шахсан Башар Асадни айблаган. 

Ушбу баёнотдан сўнг, Twitter ижтимоий тармоғида матбуот котибининг сўзлари юзасидан фикрлар билдирила бошланди. 

"Шон Спайсер газ камераларини Ҳолокост марказлари деб атади. У ҳолда, тахминимча, Гуантанамо  — Маданиятлараро марказ, шекилли", — деб ёзади фойдаланувчилардан бири. 

Журналистлар брифингдан сўнг, Спайсер нацистлар Германиясининг газ камераларини қўллаганидан хабари бор ёки йўқлигига аниқлик киритишмоқи бўлишди. Бунга жавобан, Оқ уй расмий вакили буни билишини, аммо Ҳитлер ҳам кимёвий қуролни шаҳарларда қўлламаганини айтди. 

"Мен Ҳолокостнинг даҳшатли оқибатларини юмшатмоқчи эмасман. Мен шунчаки, кимёвий қуролни аҳоли пунктларига қўллаш учун авиациядан фойдаланиш чегарасини белгиламоқчи бўлдим. Бегуноҳ инсонларга қарши ҳар қандай ҳужумга йўл қўйиб бўлмайди", — деган Шон Спайсер. 

Конгресснинг вакиллар палатасидаги Демократлар камчилиги етакчиси Нэнси Пелоси ўз навбатида АҚШ президенти матбуот котиби Шон Спайсерни, Асадни Ҳитлер билан қиёслагани учун истеъфога чиқаришни талаб қилди. 

"Шон Спайсерни ишдан бўшатиш керак. Президент Трамп эса ўз вакилининг сўзларини инкор этиши шарт", — дейилади Пелоси баёнотида. "Спайсер ё президент номидан гапирган ёки президент уни ёлламаслиги керак эди", — деб қўшимча қилган Пелоси.

АҚШ президенти матбуот котиби Шон Спайсер эса, ўзининг беўхшов ўхшатиши учун узр сўрашга мажбур бўлди. У Башар Асадни Адольф Ҳитлерга қиёслаган эди, деб хабар қилмоқда Associated Press агентлиги.

Спайсер ўз баёнотини "беадаб" ўхшатиш деб баҳолаган.