Россиялик миллиардер Алишер Усмонов ўз шаъни ва қадр-қимматини ҳимоя қилиш даъвоси бўйича мухолифатчи Алексей Навальнийга моддий эътирозлар билдирмади. Бу ҳақда Москванинг Люблин суди матбуот хизматида 13 апрелда маълум қилинди.

"Усмоновнинг даъвосида Навальнийга мулкий эътирозлар йўқ", деб айтган суд вакили. Унинг айтишича, Усмонов фақатгина тарқатилган ахборотни инкор қилишни талаб қилмоқда.

Маълум қилингандек, суд 5 кун ичида Усмоновнинг даъво аризасини ишлаб чиқаришга қабул қилиш масаласини ҳал қилади.

Усмоновнинг Навальний устидан судга даъво аризаси бериши 12 апрелда маълум бўлган. Усмоновнинг айтишича, Навальний миллиардерни Россия бош вазири Дмитрий Медведев билан коррупциявий алоқалар, даромад олишнинг яширин схемалари ва ходимларини арзимаган пулга ишлатиб, уларни "тунашда" айблаб, "мумкин бўлган чегарадан ўтиб кетган".

Навальнийнинг коррупцияга қарши жамғармасида миллиардернинг юристлари билан судда "кўришишдан мамнун бўлишлари" билан жавоб берилган.

РИА “Новости” ахборот агентлиги томондан сўралган адвокатлар, Усмонов суд жараёнида ўзининг ҳақлигини исботлай олишини тахмин қилишган. Уларнинг таъкидлашларича, ОАВда чоп этилган маълумотларга кўра, Навальнийнинг "Бу сизга Димон эмас" деб номланган фильмида сўзланган, Рублёвкадаги данғиллама уй билан боғлиқ битимда ҳеч қандай қонунбузарлик бўлмаган.