АҚШ президенти Дональд Трамп Япония бош вазири Синдзо Абэга, Вашингтон КХДРга нисбатан қандайдир ҳаракатлар қилишдан аввал Токио билан маслаҳатлашишига ваъда берди. Kyodo’нинг дипломатик манбаларга асосан хабар беришича, бу ҳақда икки давлат раҳбарининг яқинда бўлиб ўтган телефон мулоқотида айтилган.

Маълумотларга кўра, Оқ уй раҳбари КХДРга қарши ҳарбий куч ишлатилса, Япония қандай таҳликада қолишини яхши тушунишини айтган. Токиода воқеалар ривожи шундай кечса, мамлакат Пхеньян томонидан жавоб зарбаси нишонига айланиши мумкинлигидан хавфсирашмоқда. Шунингдек, Трамп мулоқот давомида Абэга АҚШнинг КХДРга нисбатан сиёсати Обама давридаги “стратегик сабр”дан “тинчлик куч эвазига” принципига ўтганини тушунтиришга ҳаракат қилган. 

Бундан ташқари, Америка президенти ўз суҳбатдошига Вашингтон КХДРда ишловчи Хитой компанияларига нисбатан янги санкциялар тўпламини тайёрлаб қўйганини айтган. Улар Пекин Пхеньян ракета-ядро дастурини тўхтатишга қаратилган уринишларда ҳамкорлик қилмаса, киритилиши мумкин. 

Эслатиб ўтамиз, Корея ярим оролидаги вазият ўтган йилнинг бошидан бошлаб яна кескинлашди, ўшанда Пхеньян ядро синовини ўтказди ҳамда кейинчалик Ер сунъий йўлдошига эга баллистик ракетани учирди. 2016 йилнинг сентябрида КХДР яна бир ядро синовини ўтказди, йил давомида эса 20дан ортиқ ракеталарни учирди.