АҚШ ҳукумати КХДР ядро дастурига қарши кўп даражали стратегияни ишлаб чиқди, деб хабар бермоқда Reuters.

Агентлик маълумотига кўра, рўйхат анча кенгайтирилган ва куч усулларини ҳам назарда тутган. Бироқ, Америка президенти Дональд Трамп биринчи навбатда, дипломатик ва иқтисодий таъсир чораларини кўриб чиқмоқда.

Санкциялар Вашингтон ёки БМТ томонидан киритилиши мумкин. Чеклов чоралари Пхеньяннинг хатти-ҳаракатларидан келиб чиқиб қўлланилади. Улар орасида – КХДРга нефть етказиб беришга эмбарго ва мамлакат денгиз маҳсулотлари ҳамда кўмирини экспорт қилишга тақиқ қўйиш бор. Мамлакат самолётларига эса бошқа давлатлар ҳаво кенгликларига кириш ман этилади, кемалари эса – бошқа портларга киритилмаслиги мумкин. Шимолий Корея компаниялари билан ҳамкорлик қилувчи Хитой банкларига санкциялар киритиш ҳам кўзда тутилган.
  
Аввалроқ АҚШ Корея ярим ороли қирғоқларига ҳарбий кемалар зарба гуруҳини юборгани маълум бўлганди. Маълумотларга кўра, КХДР янги ядро синовини мамлакат асосчиси Ким Ир Сен туғилганига 105 йил тўлиши муносабати билан 15 апрель куни ўтказиши мумкин.