Лос-Анжелес шаҳри метрополитени бошқармаси Хитойнинг China Railway Rolling Stock Corporation (CRRC) вагонлар қуриш корпорацияси билан қиймати 647 млн. доллар бўлган 282та вагонни харид қилиш ҳақида шартнома имзолади. Бу ҳақда China Daily нашри ёзмоқда.

Мақолада айтилишича, келишувни амалга оширишнинг биринчи босқичида метрополитен 178 млн. доллар эвазига 64та вагонни сотиб олади. Улар буюртмачига 2021 йилнинг сентябрида етказиб берилади.

"Биз еттита янги бекат қурилганидан сўнг, метрога тушувчи кишилар кунига 80 мингга кўпайишини кутмоқдамиз", - дея маълум қилди Лос-Анжелес метрополитени бош директори Филипп Вашингтон. Унинг сўзларига кўра, ҳар куни метродан тахминан 1,3 млн. киши фойдаланади.

CRRC томонидан чиқарилувчи вагонлар соатига 120 км. тезликка қадар етиши ва 40 йил давомида ҳеч қандай муаммосиз хизмат кўрсатиши мумкин, дейилади мақолада.