1990 йилдан бошлаб серияли ишлаб чиқариш учун мўлжалланган учар автомобилни яратиш устида ишлаб келаётган Словакиядаги AeroMobil компанияси Top Marques Monaco 2017 кўргазмаси доирасидаги автошоуда AeroMobil 3.0 учар машинасини намойиш қилади. Кўргазма Монакода 20-23 апрель кунлари бўлиб ўтади ва экстра синфдаги автомобилларни намойиш қилишга ихтисослашган. 

Учар машина тақдимотидан кейин исталган одам ушбу автомобиль учун буюртма бериши мумкин. Ушбу ноодатий машинанинг нархи эълон қилинмаган, бироқ тахминларча, бир неча юз минг доллар туриши мумкин.

AeroMobil 3.0 парвози учун 200 метргача узунликдаги учиш полосаси талаб қилинади ҳамда ўтли қопламага эга аэродромлардан ҳам уча олади. Машинада вертикал учиш кўзда тутилмаган. Машинанинг эни қанотлари очилган ҳолатда 8,32 метрни, стандарт ҳолатда эса 2,24 метрни ташкил қилади. Автомобиль узунлиги 3,06 метр келади. Кўргазмада машинанинг икки ўриндиқли версияси намойиш қилинади, келгусида эса компания машинанинг 4 ўриндиқли вариантини ишлаб чиқармоқчи.

AeroMobil 3.0 4 ғилдиракли асосда лойиҳаланган. Учар машина карбондан тайёрланган ҳамда жуда енгил – 600 кг оғирликка эга. У 4 цилиндрли, 100 от кучи берувчи Rotax 912S двигатели билан жиҳозланган. Машина ҳавода 200 км/соат тезлик билан, ерда эса 160 км/соат тезлик билан ҳаракатлана олади. Машина ҳавога 130 км/соат тезлик билан 200 метрлик полосадан кўтарила олади. Машинанинг учиш узоқлиги 700 км ни, ердаги юриш узоқлиги 875 км ни ташкил қилади. Машина қўниши учун 50 метрлик полоса кифоя қилади.