Uber такси хизмати илк бор молиявий кўрсаткичларини ошкор қилди, деб хабар бермоқда Bloomberg ахборот агентлиги. Маълумотларга кўра, такси хизмати кўрсатувчи компания 2016 йилни 6,5 млрд долларлик тушум олган ҳолда, 2,8 млрд долларлик соф зиён билан якунлаган.  

Uber вакилларининг айтишича, 2016 йилда буюртмалар ҳажми 2 мартадан кўпроққа ошган ва 20 млрд долларга етган. Бу кўрсаткич бутун ташишларнинг умумий қийматини кўрсатади. Компанияда таъкидланишича, ўсиш суръатларига кўра даромадлар йўқотишларни ортда қолдирган.

Uber’нинг соф зиёни Хитойдаги бўлинмаси ҳисобга олинмаган ҳолда, 2,8 млрд долларни ташкил қилган. Компаниянинг Хитойдаги бўлинмаси 2016 йил ёзида маҳаллий рақобатчи – Хитойнинг энг йирик такси хизмати Didi Chuxing’га сотиб юборилганди.

Uber’да тушунтирилишича, тушум ўз ичига нархлардан олинадиган бир қисм даромадларни олади. Бундан биргаликда сафарлар учун UberPool хизматидан олинган буюртмалар истиснодир, бу ҳолатда компания сафар учун олинган бутун ҳақни даромад сифатида ҳисоблайди. Компания буюртмалар ҳажмидан қанча улушини тушумга қўшиши маълум қилинмаган. Шу тариқа, UberPool аудиторияси қанча кўп бўлса, даромад ҳам шунча кўп бўлади.

Зиёнларга ходимларга бонуслар, кўчмас мулкка харажатлар, автомобилларни харид қилиш ва баъзи бошқа харажатлар кирмайди. 

Ҳозирда Uber инвесторлар томондан 69 млрд долларга баҳоланади. Компания 75 та давлатда ишлайди. Айни вақтда компания ихтиёрида 7 млрд доллар ўз маблағи ҳамда ишлатилмаган 2,3 млрд долларлик кредит мавжуд. Компания бутун фаолияти давомида камида 8 млрд доллар сарфлаган.