Ўзбекистонда она ва бола саломатлиги, келажак авлод ҳақида қайғуриш, шу мақсадда ҳомиладор аёллар учун ҳам қулай шароитлар барпо қилиш давлат сиёсатига кўтарилган. Бу борада қатор қарор ва фармонлар қабул қилинмоқда. Бир неча йиллар айнан Она ва бола билан боғлиқ равишда номланди. Бир неча ой муқаддам, ҳомиладор аёллар ва 3 ёшгача бўлган болаларга давлат томонидан бепул витаминлар тақдим этишга қарор қилингани ҳам фикримиз исботидир. 

Бироқ, жамиятимизда кўзга ташланадиган айрим ҳолатлар мазкур қилинаётган ишларга соя ташлаб туради, десак муболаға бўлмайди. Бунда, бевосита соҳа ходимларига боғлиқ бўлмаган жиҳатлар ҳам талайгина. Хусусан, Тошкент шаҳридаги Чилонзор тумани 7-сонли туғуруқ комплекси кўплаб оилаларнинг қувончли онларига гувоҳ бўлгани аниқ. Аммо, ушбу масканга олиб келувчи ягона йўл ачинарли аҳволда экани, унинг Лутфий кўчаси томондан ва Қатортол савдо маркази томондан кириб келишда ҳомиладор аёллар ва туғилажак фарзанд ҳаётига хавф соладиган даражада ўнқир-чўнқир бўлиб кетганини қандай изоҳлаш мумкин? 

Кун.uz таҳририятига ўқувчиларимиздан бири йўллаган видеолавҳада йўлнинг ҳолати акс этган. Муаллифнинг изоҳ беришича, мазкур туғуруқ комплексига, асосан, ҳомиласи тушиб қолиш хавфи бўлган ҳомиладор аёллар даволаниш учун юборилади. Шу ўринда, яна бир савол туғилади: ҳомиласидан ажраб қолмаслик ва ёхуд бир норасидани, энг асосийси, Ўзбекистоннинг бўлажак фуқароси, ватандошимизни дунёга келтириш умидида шифохонага йўл олган аёл шўрлик, бу ерга етиб келмасиданоқ, йўлнинг ўзида оғир синовга дучор бўлиб туришини қандай сўз билан изоҳлаш мумкин? Бу йўлда ҳаракатланиб келаётган энг юмшоқ транспорт воситаси ҳам агар учар автомобиль бўлмаса, ҳомиладор аёл аҳволини ёмонлаштирса, ёмонлаштирадики, асло бунинг акси ҳақида ўйлаш хомхаёлдир. 

Жавобсиз қолаётган саволлар янги саволларни пайдо қилади. Наҳотки, ушбу туман ҳокимияти ёки йўл хизмати идоралари, ё бўлмаса ҳуқуқ-тартибот идораларида ишловчи бирор ходим мазкур кўчадан ўтмаган ёки мутасадди ташкилот вакиллари шу йўлнинг аҳволидан хабарсиз бўлса? Наҳотки, ушбу туғруқ комплексида ишловчи шифокорлар, раҳбарлар мазкур йўл аҳволи юзасидан масъул идораларга мурожаат қилмаган? Ёхуд, бевосита шу ҳудудга туташ тураржойларда истиқомат қилувчи фуқаролар, маҳалла оқсоқоллари ҳам шунчалик беэътибормикин? “Сен менга тегма, мен сенга тегмайин” иллатидан, таъбир жоиз бўлса, Ватан равнақига бўлган энг катта тўсиқдан қачон қутиламиз?...

Нима ҳам дердик, Кун.uz таҳририяти мазкур муаммо юзасидан мутасадди ташкилотлар идоралари ҳолатни жойида ўрганиб, ижобий ҳал қилади, деган ишонч билдиради. Ўйлаймизки, яқин орада, биз ушбу комплексга борадиган йўлнинг тўлиқ капитал таъмирлангани ҳақида хабар берамиз.