Халқаро фуқаро авиацияси ташкилоти Ўзбекистон авиация тизимини текширди

Ўзбекистон 21 Апрель 2017 5290

Халқаро фуқаролик авиацияси ташкилоти (ИКАО) экспертлар гуруҳи 10-21 апрель кунлари Ўзбекистон Республикаси фуқаролик авиацияси тизимини аудит қилди. Бу ҳақда Кун.uz'га МАК хабар берди.

Ушбу аудит узлуксиз мониторинг Механизми доирасида парвозлар хавфсизлигини таъминлаш бўйича назоратни ташкил этишни текшириш бўйича ИКАО ва Ўзбекистон Республикасининг ўзаро англашув Меморандумига мувофиқ ўтказилди.

ИКАО қароргоҳи аудитлар секцияси, Германия, Франция, Куба ва Канада авиация маъмуриятлари мутахассисларидан иборат аудиторлар гуруҳи республиканинг фуқаролик авиацияси, тартибга солиш ва назорат тизимини ташкил этиш, авиация ходимларини лицензиялаш соҳасидаги парвозлар хавфсизлиги бўйича назоратни таъминлаш, парвозларни ишлаб чиқиш, учиш муддати, авиация ҳодисаларини текширувдан ўтказиш ва аэродром таъминлови соҳасидаги қонунчилигини текширишди. Шунингдек, экспертлар “Ўзбекистон ҳаво йўллари” Миллий авиакомпанияси ва “Silk Road Cargo Business” авиакомпанияси бўлинмаларига ташриф буюришди ҳамда у ерда Ўзбекистон Республикаси Дававианазорати томонидан ишлаб чиқилган норматив қоидаларни амалга ошириш билан танишишди.

Аудит якунлари бўйича Ўзбекистон Республикаси фуқаролик авиациясида парвозлар хавфсизлиги даражасини ошириш бўйича қатор тавсиялар ишлаб чиқилади.

Кўпроқ янгиликлар