Ўзбекистонда тадбиркорлар учун қулай шароитлар йилдан йилга яхшиланиб бормоқда. Қонунчиликдаги ўзгаришлар, солиқ соҳасидаги имтиёзлар бу соҳада фаолият юритиш учун янги имкониятлар эшигини очиб бермоқда. Мамлакат ялпи миллий маҳсулоти таркибида кичик ва ўрта бизнес субъектлари ҳамда хусусий тадбиркорлар томонидан ишлаб чиқарилаётган маҳсулот ва хизматлар улуши ортиб бормоқда.

Шунга қарамай, ушбу соҳада салбий ҳолатлар ҳам учраб турибди. Яъни, масалан, хукуматнинг тадбиркорлар учун борган сари қулай шароит ва имтиёзлар яратиб беришига қарамасдан, айрим жойларда тадбиркорлик субъектларининг фаолият юритишига бевосита тўсқинлик қилиш ҳолатлари учраб турибди. Ачинарлиси, бундай вазиятлар маҳаллий мутасадди органлар томонидан амалга оширилаётгани, тадбиркорлик субъектларининг мурожааталари эса эътиборсиз қолдираётганлиги киши кўнглини ғаш қилади.

Kun.uz  таҳириятига йўлланган мурожаатларнинг бирида қуйидаги масала кўтарилган. Тошкент шаҳрида жойлашган “Фарҳод деҳқон бозори” ёнидаги “Фарҳод ярмаркаси” дўконларида фаолият юритувчи тадбиркорлар дуч келаётган қийинчиликлар-у, сарсон-саргардонликларни келтириш мумкин.

Бу ерда фаолият юритаётган тадбиркорлар билан боғлиқ муаммо 2011 йилда Учтепа туман ҳокимининг 21.06.2011 йилдаги 283-сонли қарори чиқиши билан бошланди. Бу қарор эса, ўз навбатида, Тошкент шаҳар ҳокиминг 11.04.2011 йилдаги 202-сонли қарори асосида чиқарилган бўлиб, унда шу ҳудудда фаолият юритаётган тадбиркорларга тегишли бўлган бино ва иншоотлар – дўконларни бузиш ҳисобига янги замонавий бинолар қуришга рухсат этилган. Амалда эса, бузиб, янги бинолар қуриш тўлиқ шу тадбиркорларнинг зиммасига юклатилган.

Бундан ташқари, янги қуриладиган бинолар майдони бир ярим баравар қисқартирилиб, бўшаган майдон автоуловлар тўхташ жойига берилган. Сабаби, янги қуриладиган бинолар икки қаватли бўлиши айтилган.

Бузиш-қурилиш ишлари қисқа муддатлар ичида бажарилиши кераклиги талаби қўйилган, натижада лойиҳа зарурий пухталик билан тузилмаган. Бундан ташқари, туман ҳокимияти томонидан тавсия қилинган пудратчи ташкилот раҳбарияти ишларни пойдевор қуйишдан у ёғига ўтмаган. Натижада ўзлаштириб юборилган маблағлар бўйича пудратчи ташкилот раҳбариятига жиноий иш қўзғатилиб, жавобгарликка тортилган.

Тадбиркорларнинг айтишига кўра, улар қўшимча харажат қилиб бўлса ҳам, бинолар қурилишини биргалашиб ниҳоясига етказишган. Лекин савдо-сотиқ ҳа деганда ҳам юришиб кетмаган. “Эски ижарачилар шунча вақт пойламайди, улар ҳам тижоратини юргазиши керак – тарқаб кетишди. Янги ижарачилар секин-секин кела бошлади. Баъзи дўкон эгалари бевосита ўзи тижорат фаолиятини юргаза бошлади.  Лекин энди катта кўча томонидан панжаралар билан тўсилган дўконларга автомобилда келиш ноқулайлик туғдиргани учун, бу ҳам савдони юришиб кетишига маълум даражада тўсқинлик қилди”, дейилади ушбу тадбиркорлар томонидан берилган маълумотда. 

Шунга қарамай, 1-2 йил ўтгач, харидорлар оқими яна аста-секин жонланди, иш секинлик билан юриша бошлади. Тадбиркорларда қилган харажатлари қопланишига умид уйғонди. Хайриятки, дўконларнинг орқа томонида автоуловлар учун ажратилган тўхташ жойи озгина бўлсада ҳайдовчилар учун қулайлик яратди, дейиш мумкин. Аммо бу ерда ҳам ўзига яраша муаммо туғилди. Тўхташ жойи қурилгандан кейин, унда “Фарҳод деҳқон бозори”дан “тижоратчилар” чиқиб, қишлоқ хўжалиги маҳсулотлари билан савдо қилишни бошлашди. Тўхташ жойининг аксар қисми мева-сабзавот савдо майдонига айланиб кетди. Бундан ташқари, нарироқда жойлашган автомобиль эҳтиёт қисмлари бозоридан чиққан мижозларга автомибилларга майда хизмат кўрсатиш, сотиб олинган эҳтиёт қисмларни шу ернинг ўзида, автотўхташ майдонида ўрнатиб берувчи “уста”ларнинг ҳам фаолияти ривожланиб кетди. Шуларнинг натижасида ушбу майдонда автомобиллар тўхтаб туриши учун деярли шарт-шароит қолмади.

Бу ҳолатга ҳам дўконлар эгалари сабр қилди. Аммо 2016 йилда “Фарҳод деҳқон бозори” маъмурияти автоуловлар учун ажратилган майдонни панжара билан ўраб олиб, тўсиб қўйгач, анча жонланиб қолган савдога путур етди – янги қурилган замонавий дўконлар яна унда-мунда кириб қолган бир-икки харидорга қараб, мўлтираб қолди.

Тушкунликка тушган тадбиркорлар Ўзбекистон Республикаси Президентига мурожаат қилишга қарор қилиб, 2017 йил февраль ойида виртуал қабулхонага ариза йўллашди ва янги қурилган дўконларнинг олд томонидаги панжараларни олиб ташлаб, “Фарҳод” кўчаси томонидан дўконларнинг олдида автоуловлар тўхташ жойи ташкил қилишга рухсат беришни сўрашди ва ушбу ишларни амалга ошириш бўйича барча харажатларни ўз бўйинларига олишни билдиришди. Маълум вақт ўтгач, ариза ҳолати “Тошкент шаҳар хокимлигида кўриб чиқилмоқда”га ўзгарди. Ҳозирги кунгача ушбу ариза юзасидан ҳеч қандай иш амалга оширилмагани айтилмоқда.

Тошкент шаҳар ҳокимиятидан ҳеч қандай жавоб бўлмагач, 2017 йилнинг март ойида тадбиркорлар юқоридаги мазмундаги аризани бевосита Тошкент шаҳар ҳокимига йўллашди. Аммо уларга бу масала юзасидан ҳеч қандай жавоб берилмаган.

“130 дан ортиқ тадбиркорнинг иши орқага тортилиб ётибди. Энди қаерга мурожаат қилсин бу тадбиркорлар – бу ҳам бир муаммо”, дейилади мактуб мазмунида.

Жойларда тўпланиб қолган муаммолар босқичма-босқич ҳал этиб келинмоқда. Бу ишлар мамлакатнинг ҳар соҳасида яққол кўзга ташланиб бормоқда. Замонавий дунёда иқтисодий бўҳронлардан чиқиб кетишнинг энг яхши усули тадбиркорлар ва кичик ишлаб чиқарувчи субъектларга эътибор қаратиш ва уларни қўллаб-қувватлашда акс этади. Ўйлаймизки, юқоридаги ҳолат юзасидан ҳам зарур чора-тадбирлар амалга оширилади.