Ўзбекистонлик ФИФА рефериси Равшан Эрматов Конфедерациялар Кубоги–2017 турнирида видеотакрорлар бўйича рефери ассистенти вазифасини бажаради. Бу ҳақда рўйхат ФИФА расмий сайтида берилган.

Олдин хабар берганимиздек, ФИФА учрашувларни бошқариш учун 9 нафар бош ҳакамларни танлаб олган. Эрматов эса уларнинг ичида йўқ эди. Ўзбекистонлик ҳакам ФИФА таснифидаги мусобақаларда иккинчи марта қўлланилаётган янги тизимни ишлатишда кўмакчи вазифасини ўтайди.

Маълумот учун, Эрматов ФИФАнинг кетма-кет иккинчи йирик мусобақасида бош ҳакам сифатида эмас, балки видеоассистент сифатида ишлаши белгиланмоқда. Бунгача ФИФА видеотакрорларни илк марта синовдан ўтказган клублар ўртасидаги ЖЧда ҳам Эрматов видеоассистент ҳакам сифатида мусобақада қатнашганди.

Конфедерациялар Кубоги жорий йилнинг 17 июнидан 2 июлига қадар Россияда бўлиб ўтади.