Хитойнинг Сиан шаҳрида февралда кўча тозалигининг янги стандартлари ишлаб чиқилди.

Кўча супурувчилар ишининг самарадорлигини тўғри баҳолаш учун шаҳар кўчалари ҳар бири тегишли стандартларга жавоб берувчи учта тоифага бўлинди. 1-тоифадаги кўчаларда бир квадрат метр майдонда 5 грамм чанг, 2-тоифадагиларда 10 грамм ва 3-тоифадагиларда 20 грамм чанг бўлишига йўл қўйилади. 

Янги қоидалар доирасида кўчаларни текшириш огоҳлантиришсиз амалга оширилмоқда. Текширув вақтида назоратчилар квадрат метр келадиган жойни ўраб, ундан чанг йиғиб, сўнгра унинг оғирлигини ўлчашган.

Агар кўча ифлос деб топилса, уни тозалашга жавобгар кўча супурувчи жарима очкоси олади. Учта жарима очкоси кўча супурувчининг ишдан бўшатилишига ва унинг раҳбариятининг интизомий жавобгарликка тортилишига сабаб бўлади.

Фото People's Daily

Кўча супурувчиларнинг ўзлари бу ғоядан унчалик хурсанд эмаслар. Ван Гуанхайнинг айтишича, у кўчалар озодаликнинг стандартларига мос келиши учун меъёридан ортиқча ишлашига тўғри келмоқда. У 3-тоифадаги кўчаларни эрталабки соат 4 дан кечки соат 6 гача супуради.

Янги қоидалар ижтимоий тармоқ фойдаланувчилари томондан ҳам танқидларга учради. Фойдаланувчилардан кўпчилиги кўча супурувчиларга нисбатан адолатсизлик қилингани ҳақида гапиришган. Уларнинг фикрича, атроф-муҳитнинг ифлосланиши муаммоси кўчаларни тозалаш жараёнини машаққатли, тинимсиз ишга айлантиради.

Сианда ҳаво ифлосланиши даражаси ўртача 153 га тенг. Ҳаво сифати индексига кўра, 0 дан 50 гача даража меъёр ҳисобланади. 

Шаньдун, Хэбэй вилоятлари ва Чжунвэй шаҳар округи ҳам шундай қоидаларни жорий қилмоқчи.