Апрель ойининг сўнгги уик-энди дербиларга бойлиги билан ёдда қоладиган бўлиб турибди. Дербилардаги натижаларнинг муҳимлиги эса уларга бўлган қизиқишни янада оширади. Бироқ супер тўқнашувлар фақат дербиларда кузатилмайди. Tribuna.Uz ойнинг сўнгги ҳафтасидаги энг ажойиб учрашувларга батафсил тўхталиб ўтади.

«Эспаньол» – «Барселона» (29 апрель, 23:45, UzReport)

 

Чемпионлик учун курашаётган «Барселона»га Каталониядаги азалий рақиб доимий равишда қаршилик кўрсатишга уриниб келган. Агар ўзи мағлуб эта олмаса ҳам, «Реал»га ютқазиб беришда (мухлислар томонидан) айбланадиган жамоани ҳазил тариқасида Мадрид фарм-клуби (худди «Атлетико»ни «Барселона фарм-клуби деб аташгани каби) ҳам дейишади. Ҳозир айни кураш энг қизиган паллада «Эспаньол» ўз ҳамшаҳарларини тўхтатиб қолишга уриниб кўриши талаб этилади.

«Эспаньол» уйида кечган сўнгги 9 учрашувдан (4Д, 5М) буён «Барселона»ни мағлуб эта олмаяпти. Сўнгги марта «Эспаньол» ўз уйида 10 йил муқаддам «Барселона»ни мағлубиятга учратишнинг уддасидан чиққан. Қайтанга жамоа «Барселона» мезбонлигидаги учрашувда 8 йил олдин ғалаба қозонишни уддалай олгани таҳсинга сазовор. Ўшанда жамоани ҳозирги «Тоттенҳэм» устози Маурисио Почеттино бошқарарди.

«Рома» – «Лацио» (30 апрель, 15:30, Матч! Футбол 2)

Сўнгги бир неча йилда Рим дербиси Италия А сериясида у қадар катта афишалар билан кутиб олинмайдиган бўлиб қолди. Жамоа футболчиларининг бир-бирига муносабатлари, ўйин вақтидаги қўполликлар, можароли вазиятлар ҳамон учраб турибди. Бироқ ўйин даражаси бўйича бу нарса ўзини оқламаётганди. Ниҳоят мартда бўлиб ўтган Италия кубогининг ярим финал учрашувлари мухлисларга ҳақиқий Рим дербиси ҳавосини тақдим эта олди. Шу нуқтаи-назардан бу сафарги чемпионат учрашуви ҳам катта қизиқиш билан кутилмоқда.

«Ювентус»нинг очко йўқотишидан сўнг «Рома» чемпионлик учун сўнгги умидларини сақлаб қолиш мақсадида бу урашувни ўз фойдасига ҳал қилиши керак бўлади. Италия кубоги ярим финалида учралган мағлубият ҳам Спаллетти шогирдларининг ғазабини қўзғаган бўлиши лозим. Бу эса учрашув натижасининг икки ҳисса муҳимлигини ва ўйин даражаси ҳам шунга мос бўлишини кўрсатиб турибди.

Икки жамоанинг уй учрашувлари битта стадионда кечишини ҳисобга олсакда, «Лацио» номинал мезбон сифатида қаралади. Шу маънода «Лацио» номинал мезбон сифатида ўтган сўнгги учта А серия учрашувида «Лацио» бирорта ҳам ғалабани қўлга кирита олмаган. Умуман «Лацио» мезбонлигидаги сўнгги 7та Рим дербисининг 4тасида «Рома»нинг қўли баланд келган. 

 «Эвертон» – «Челси» (30 апрель, 18:05, Матч! Футбол 1)

«Эвертон» таркибдаги бир қатор йўқотишларга қарамасдан АПЛда барқарор очко ишлашда давом этмоқда. Куман шогирдлари кетма-кет 4 учрашувдан буён АПЛда мағлубиятсиз юришини давом эттирмоқда. 58 очко тўплаган ливерпулликлар 7-ўринда бормоқда. Жамоада ЕЧЛ йўлланмаси учун ҳам назарий бўлсада имконият сақланиб қолган. Албатта бу вазифани уддалаш деярли имконсиз бўлсада, Европа лигасида тўғридан-тўғри қатнашиш имкониятини тақдим этадиган 5-6 ўринлар ҳам «Эвертон» учун жуда яхши натижа бўлиши шубҳасиз. Бу йўлда жамоа чемпионлик учун кураш олиб бораётган «Челси»ни тўхтатиб қолиши керак бўлади.

«Эвертон» жорий мавсумда ўз уйида 17  учрашувда 40 очко тўплашга муваффақ бўлди. Фақатгина «Ливерпуль»га қарши учрашувда сўнгги сонияларда ўтказиб юборилган гол эвазига жамоа мағлубиятга учради. Ҳозирда жамоанинг уй учрашувларидаги ғалабали серияси 7 учрашувга етган. Ўз навбатида «Челси» меҳмонда ўтказган 17 учрашувда 36 очко тўплаган ва бу борада ҳам АПЛ етакчиси бўлиб турибди.

Жамоаларнинг Ливерпулдаги сўнгги 9 учрашувида «Челси» фақатгина икки марта ғалаба қозона олган. «Эвертон олти марта ғалаба қозонган бўлса, битта учрашувда дуранг қайд этилган. Сўнгги марта «Челси» «Эвертон» уйида 2014/15 йилги чемпионлик мавсумида 2014 йилнинг августида 6:3 ҳисобида ғалаба қозониб қайтган. Сўнгги икки учрашувда эса Ливерпулдан жамоа мағлубият билан қайтган. Биринчи даврада Лондонда бўлиб ўтган учрашувда эса «Челси» 5:0 ҳисобида ғалаба қозонган.

«Тоттенҳэм» – «Арсенал» (30 апрель, 20:30, Матч! Футбол 1)

«Тоттенҳэм» ўтган ҳафтада Англия кубогида «Челси»га 2:4 ҳисобида имкониятни бой бериб мусобақадан чиқиб кетди. Энди Маурисио Почеттино жамоасида ягона имконият премьер-лигада ғалаба қозониш бўлиб қолмоқда. «Челси» билан тўрт очколик фарқни сақлаб турган «шпорлар» «Арсенал»га қарши учрашувда ғалаба қозонган тақдирда нафақат чемпионлик учун курашни давом эттиради. Балки узоқ йиллик танаффусдан сўнг илк марта ўзининг энг азалий рақибидан турнир жадвалида юқорида бўлиш масаласини муддатидан ҳал қила олади. 

Шимолий Лондон дербисининг аҳамиятини мана шундан ҳам билиб олиш мумкин. Ҳеч бўлмаганда жамоалар азалий рақибидан олдинроқда жойлашиши керак. Ўтган мавсумда Почеттино бу вазифани уддалай олмаганди. Бу сафар эса бунинг учун янада яхшироқ имконият унинг шогирдларида юзага келган.

Икки жамоа ўртасидаги премьер-лиганинг сўнгги уч учрашувида ғолиб жамоа аниқланмаган. Уччала учрашувда ҳам дуранг қайд этилган. Умуман олганда «Арсенал» «Тоттенҳэм» устидан премьер-лига доирасида сўнгги марта 2013/2014 йилги мавсумда айнан «Тоттенҳэм» уйида ғалаба қозонишни уддалаганди. уч мавсумдирки, Венгер жамоаси бу ишни уддалай олмаяпти. Умуман олганда «Арсенал» «Уайт Ҳарт Лэйн»да кечган сўнгги 10 учрашувнинг фақат иккитасида ғалаба қозонган (4Д, 4М).

«Интер» – «Наполи» (30 апрель, 23:45, Sport TV, Матч! Футбол 2)

Жуда қийин даврларни бошидан ўтказаётган «Интер» сўнгги 5 учрашувдан буён ғалаба нималигини билмай келмоқда. Бу эса жамоанинг еврокубоклар учун курашдаги имкониятини кесин пасайтириб юборди. «Наполи»га қарши учрашув бу борада Пиоли шогирдлари учун сўнгги имконият бўлади. Агар миланликлар нохуш даврга барҳам беришни уддалай олишса, еврокубоклар учун курашни давом эттириши мумкин бўлади.

«Наполи» эса ЕЧЛга тўғридан-тўғри йўлланма учун «Рома» билан курашни давом эттирмоқда. Орадаги фарқни қисқартириш учун ҳам неаполликлар бу учрашувда ғалаба қозонишга уриниб кўришади. 

«Наполи» Миланда 2000 йилдан буён фақат бир мартагина ғалаба қозонишни уддалаган. Икки жамоанинг «Интер» мезбонлик қилган сўнгги уч учрашувнинг иккитасида эса дуранг қайд этилган. Умуман олганда сўнгги 10та учрашувда «Интер» 7 марта ғалаба қозонган, 2 дуранг, «Наполи»нинг ягона ғалабаси.

«Ницца» – «ПСЖ» (30 апрель, 23:59, Матч! Футбол 1)

«Ницца» учун бу Франция чемпионлиги учун курашиш учун сўнгги имконият бўлади. Агар жамоа ғалаба қозонган тақдирда, «Лестер»га тенглаштирилаётган жамоа бу номни қайсидир маънода оқлаган бўлади. Ҳозирда «ПСЖ» билан 6 очкони ташкил қилмоқда. Ғалаба икки етакчи билан орадаги фарқни 3 очкогача қисқаришига сабаб бўлади.

Ниццада кечган сўнгги олти учрашувнинг фақат биттасида «Ницца» ғалаба қозонишнинг уддасидан чиққан. «ПСЖ»да тўртта ғалаба. Унгача эса «Ницца» ўз уйида кетма-кет тўртта учрашувда ғалаба қозонганди. Икки жамоа ўртасидаги биринчи даврада Парижда кечган учрашувда ғолиб аниқланмаган — 2:2. Бу «Ницца»нинг олти йил давомида илк марта Париждан очко олиб қайтиши бўлганди.

Бундан ташқари...

Испания чемпионлик курашини авж олган даврда «Реал» «Валенсия»га қарши ( 29 апрель, 19:15) синовдан ўтади. Шанба кунги дастурдан шунингдек «Вольфсбург» - «Бавария» (21:30) ўрин олган. Россия чемпионатининг икки етакчиси «Спартак» ва ЦСКА қарама-қаршилиги ҳам шиддатли курашларга бой ўтиши кутилмоқда.