«Бавария» жамоаси бош мураббийи Карло Анчелотти ўз фаолиятида илк марта Германия чемпионига айланди.

Шу тариқа, 57 ёшли итальян мутахассиси Топ-5 чемпионатларидан 4тасида жамоасини чемпионликка олиб келган илк мураббийга айланди.

Бунгача Анчелотти A Серияда «Милан» билан (2004), Премьер-лигада «Челси» билан (2010), ва Лига 1 да «Пари Сен-Жермен» билан (2013) чемпионликка эришганди.

Анчелотти Испанияда ҳам ишлаган, аммо 2 йиллик фаолияти давомида «Реал» билан фақат Испания Кубогида зафар қучган, аммо чемпионатдаги ғолиблик насиб этмаганди.

Анчелоттининг «Бавария» билан амалдаги шартномаси 3 йилга мўлжалланган. Жамоа жорий мавсумнинг 31-турида «Вольфсбург»ни 6:0 ҳисобида енгиб, муддатидан олдин чемпионликни таъминлади.