Оливер Стоун Владимир Путин ҳақида фильм ишламоқда

Маданият 30 Апрель 2017 7478
Фото: РИА "Новости"

Америкалик кинорежиссёр Оливер Стоун "Sydney Morning Herald" газетасига берган интервьюсида РФ президенти Владимир Путин ҳақидаги фильм устида ишлаётганини маълум қилди.

2016 йилда Стоун "Олов ичидаги Украина" фильмини ишлашда ҳам фаол қатнашган ва Россия президенти Владимир Путин ҳамда Украина президенти Виктор Януковичдан интервью олишга муваффақ бўлган.

"Жаноб Путин дунёнинг энг муҳим етакчиларидан бири, АҚШ уни душман - буюк душман, дея эълон қилган экан - у бу борада нима дейиши мумкинлигини тинглашимиз жуда муҳим, деб ҳисоблайман", - деди Стоун. Режиссёр бу шунчаки ҳужжатли фильм эмас, савол-жавоб шаклидаги суҳбат эканини қўшимча қилди. 

Манбада таъкидланишича, фильмда Путиннинг 2000 йилда РФ президенти лавозимини эгаллаган вақтидан бошлаб жаҳонда бўлаётган ҳодисаларга нисбатан муносабати кўрсатилади. Фильм намойиши ҳақида ҳозирча расман эълон қилинмаган.

"Фильм биз америкаликлар эшитмаган нуқтаи назарни очиб беради", - дея таъкидлади Стоун. Унинг сўзларига кўра, фильмни суратга олиш гуруҳи икки йил ичида тўрт марта РФ президенти билан учрашган. 

Стоун ўткир сиёсий мавзулардаги фильмларни суратга олувчи режиссёр сифатида танилган. Ўз вақтида президентлар Ричард Никсон, Жон Кеннеди, кенжа Жорж Бушлар унинг қаҳрамонлари бўлган. Бундан ташқари, унинг сўнгги фильми - 2016 йилнинг кузида премьераси бўлиб ўтган АҚШ махсус хизматларининг собиқ агенти Эдвард Сноуден ҳақидаги фильми ҳам катта шов-шувга сабаб бўлган.

Кўпроқ янгиликлар