Германия террорчиликка қарши курашда Саудия Арабистонига кўмак бериб, ўз ҳудудида саудиялик ҳарбийларга сабоқ беради. Бу ҳақда 30 апрелда Германия канцлери Ангела Меркель маълум қилди, деб хабар бермоқда ТАСС ахборот агентлиги. 

"Саудия Арабистони минтақада муҳим давлат, террорчиликка, ИШИДга қарши курашдаги бўғин ҳисобланади. Биз бу давлат чегаралари яхши ҳимояланган бўлиши, Саудия армияси ИШИДга қарши кураш учун яхши ўргатилган бўлишидан манфаатдормиз", деб айтди канцлер. Айни вақтда канцлер Саудия Арабистонида сафар билан қолмоқда. 

Саудия Арабистони Сурия ва Ироқда ИШИДга қарши курашувчи АҚШ бошчилигидаги коалиция таркибига киради. Бироқ баъзиларнинг фикрича, қиролликнинг ўзи террорчиликни қўллаб-қувватлайди.