2 май куни Миллий матбуот марказида Соғлиқни сақлаш вазирлиги томонидан “Ҳар бир мурожаат эътиборда: Ўзбекистон Республикаси Президенти виртуал қабулхонасига мамлакатимиз соғлиқни сақлаш тизими бўйича келиб тушаётган мурожаатлар таҳлили” мавзусида матбуот анжумани ташкил этилди. 

Анжуман давомида ОАВ ходимлари томонидан йўлланган саволларга ҳам батафсил жавоблар берилди. Шунингдек, мамлакатда ихтисослашган тиббий ёрдам кўрсатишда учрайдиган муаммо ва камчиликлар талайгина экани қайд этилди. 

Бу муаммоларни олдини олиш мақсадида, республиканинг 3 ҳудудида халқаро талабларга жавоб бера оладиган катта кардио-жарроҳлик амалиёт марказлари очилиши маълум қилинди. Мазкур марказларга халқаро миқёсдаги экспертлар, жарроҳлар жалб этилади ва айни дамда юртимизда кардиологик касалликлардан азият чекаётган 3 мингга яқин болалар даволанади.

"2016-2020 йилларда Ўзбекистонда оналик ва болаликни муҳофаза қилиш тизимини янада такомиллаштириш чора-тадбирлари тўғрисидаги Президент қарорига кўра, 2020 йилгача мамлакатимизнинг барча минтақаларида чақалоқлар жарроҳлигини ва аёллар учун каминвазиф жарроҳликни, шунингдек, опреацияларга бўлган эҳтиёжни тўлиқ қоплаган ҳолда Самарқанд, Наманган ва Хоразм вилоятларида болалар кардиохирургиясини янада ривожлантириш кўзда тутилган", — дейди Соғлиқни сақлаш вазири ўринбосари Элмира Боситхонова.