YeChL yarim finali: «Atletiko» qasos o‘tida yonmoqda
|21:12 / 02.05.201725 20613 min
Bugun Madridning «Real» klubi UYeFA chempionlar ligasi yarim finali dastlabki uchrashuvi doirasida o‘z stadioni «Santyago Bernabeu»da hamshaharlari «Atletiko» klubini qabul qiladi.
«Real»ga bas kelishda «Atletiko» yarimhimoyachisi Antuan Grizmanning o‘yiniga ko‘p narsa bog‘liq
Toshkent vaqti bilan soat 23:45da start oladigan Madrid derbisi bilan UYeFA chempionlar ligasi yarim final uchrashuvlari boshlab beriladi. Diyego Simeone jamoasi, mana, to‘rtinchi mavsumdirki, ko‘hna qit'aning eng asosiy turnirida «qirollik klubi»ga ro‘baro‘ bo‘lmoqda.
Oldingi uch baslashuvning barchasi «qaymoqranglilar»ning g‘alabasi bilan yakunlangan edi. Boz ustiga ikki bor bu hodisa finalda ro‘y bergan – 2014 yil qo‘shimcha vaqtda — 4:1 va 2016 yil 1:1 (penaltilar seriyasidan so‘ng 5:3). Finalda har ikki marta 90 daqiqa kuchli jamoani aniqlab bera olmagan. 2014/15 yilgi mavsumda esa «Atletiko» chorak finalda yutqazib chiqib ketgan edi. O‘shanda «Santyago Bernubeu»da o‘tgan javob uchrashuvida Chicharitoning 88-daqiqada kiritgan goli hamma narsani hal qilgan edi.
«Real» yarim himoyachisi Isko yangi qarama-qarshilik oldidan eski kurashlarni yodga olar ekan, Lissabonda o‘tgan 2014 yilgi finalda Serxio Ramos tomonidan kiritilgan golga alohida e'tibor qaratdi. Aynan «Real» sardorining qo‘shimcha vaqtda urgan goli «qirollik klubi»ga o‘yinni qo‘shimcha bo‘limlarga o‘tkazishga imkon yaratgan edi.
«Ramosning Lissabonda urgan golini eslasam hanuzgacha badanim jimirlab ketadi. Bu o‘ta muhim o‘yin edi va Serxio to‘p kiritgach, endi albatta g‘alabaga erishishimiz ma'lum bo‘lib qolgan edi.
Milanda o‘tgan penaltilar seriyasi kareramdagi eng keskin va asablarni taranglashtiradigan vaziyat bo‘lgan. O‘shanda agar dastlabki beshta zarbadan so‘ng hisob tengligicha qolganida men ham o‘n bir metrlik nuqtadan zarba berishim kerak edi, biroq jamoadoshlarim hammasini chiroyli yakunlashgandi.
Umid qilamanki, bu safargi qarama-qarshilik yakuni ham oldingi natijalarga o‘xshash bo‘ladi. Biroq «Atletiko» o‘yinchilari ham qasos o‘tida yonishayotgani aniq», — deya Iskoning so‘zlarini keltiradi ispanlarning Marca nashri.
«Real»ning bosh murabbiyi Zayniddin Zidan bu o‘yinda uelslik yarimhimoyachi Garet Beyl xizmatlaridan foydalana olmaydi. Mahalliy AS nashri muxlislar o‘rtasida so‘rov o‘tkazib, ularning 60 foizi Garetning o‘rnida Iskoni ko‘rishni istashayotganini aniqlagan, biroq fransiyalik murabbiy maydonda o‘yinchilarga to‘g‘ri pozitsiya topib bera olishdek noodatiy qarorlari bilan mashhur, shu sababli biror narsa taxmin qilishga shoshilmaslik kerak — Zidanning ixtiyorida Marko Asensio, Xames Rodriges va Lukas Vaskes bor.
Lekin Rafael Varan umumiy guruhga qaytgan, agar markaziy himoyachilardan faqat Ramos va raqiblaridan mahorat bobida ustun emasligi kundek ravshan bo‘lgan Nacho Fernandesgina safda ekanligi e'tiborga olinsa, «qaymoqranglilar» uchun bu katta voqea.
Simeone esa, o‘z navbatida, sog‘aygan yarimhimoyachi Yannik Karraskoni o‘z bag‘riga qabul qildi, biroq himoyachisi Xose-Mariya Ximenesdan ayrilgan. Nima bo‘lganda ham, «Las-Palmas» bilan bo‘lgan o‘tgan uchrashuvda (5:0) olgan jarohati uning birinchi yarim finaldagi uchrashuvini so‘roq ostiga qo‘yib turibdi.
Oldingi uchrashuvlar va har ikki klubning o‘yin odatidan kelib chiqilsa, bu qarama-qarshiliklar gollarga boy bo‘lishini kutish yaramaydi. Bu holatda «matraschilar» uchun mehmonda gol urib olish katta muvaffaqiyat bo‘lardi. O‘yin oldidan himoyachi Diyego Godin ham shu haqida gapirib o‘tgan.
«Bu teng kuchli raqiblar bahsi. Yarim finalga yetib kelgan barcha jamoalar shunga loyiqdirlar.
Bunday uchrashuvlarda mehmonda gol kiritish doimo muhim bo‘lgan. Biz aynan shu vazifani amalga oshirmoqchimiz. Bizda o‘yinga tayyorlanish uchun ko‘p vaqt bo‘lmadi. Bir necha kun avvalgina maydonga tushgandik. Biroq biz «Real» va uning shonli tarixi haqida yaxshi bilamiz.
Biz oldingi mag‘lubiyatlardan saboq chiqarganmiz. Bu o‘yinga barcha muhim o‘yinlarga tayyorlanganimizdek puxta tayyorgarlik ko‘rganmiz», — deya Godinning so‘zlarini keltiradi UYeFA sayti.
«Gol»ga o‘ynash qiyin bo‘lishi haqida o‘yin oldidan shogirdlarining himoyadagi o‘yini eng kuchli jihati emasligini juda yaxshi biladigan Zidan ham aytib o‘tgan edi.
«Nima bo‘lgan bo‘lsa, hammasi tarixda qoldi. Ortga qarashdan naf yo‘q. Bizda ijobiy tajriba bo‘lgan, biroq endi hammasi boshqacha. Biz o‘yinda favorit emasmiz. Imkoniyatlar 50-50, pley-off bosqichida o‘zi doimo shunaqa bo‘lib kelgan. G‘alaba qozonish uchun barcha narsani ishga solishni rejalashtirganmiz. Hozircha javob o‘yini haqida o‘ylamayapmiz. Barcha o‘y-xayollarimiz o‘yinga qaratilgan, keyin nima bo‘lishi haqida o‘ylab ko‘rishga vaqtimiz bor.
O‘tgan mavsumga solishtirganda darvozamiz daxlsizligini saqlab qolish qiyinroq bo‘lmoqda. Bu — futbol, har qanday jamoaning kuchli jihatlari bo‘ladi, «Atletiko» ham bundan mustasno emas. Biz uchun har doim raqibdan ko‘proq gol urish muhim bo‘lib kelgan.
Lekin biz gol urib, darvozamiz daxlsizligini saqlab qolishga urinamiz, axir bu pley-off», — deya Zidanning so‘zlarini keltiradi UYeFA sayti.
«Real» ruliga Zayniddin Zidan kelganidan buyon har ikki jamoa o‘yinida umumiy jahatlar ko‘proq ko‘zga tashlana boshladi. Nima bo‘lganda ham, «matraschilar» ham, «qaymoqranglilar» ham kuchli qarshi hujumda tezlik bilan raqib himoyasini yorib o‘tadi. Faqat farqi shundaki, «Real» raqibidan farqli o‘laroq, hanuzgacha himoyada o‘yinini tartibga keltira olgani yo‘q.
«Real» o‘yinning har bir tarkibiy qismida kuchli. Ular yaxshi himoyalanib, kuchli hujumlar uyushtirishadi. Biroq «Atletiko» ham raqibiga ko‘ngilsizliklar taqdim eta oluvchi jamoalar sirasiga kiradi. Har ikki jamoaning o‘yin uslubi o‘xshash. Kim o‘yin rejasini hayotga tatbiq eta olsa, o‘sha yutadi», — deya Gabining so‘zlarini keltiradi UYeFA matbuot xizmati.
Biz o‘z hissiyotlarimizni jilovlashimiz kerak. Menda boshqa jamoalardan ko‘ra «Real»ga qarshi o‘tadigan o‘yinlar ko‘proq hayajon keltirib chiqaradi.
Albatta, biz yana bir bor finalga chiqishni istaymiz. Chempionlar ligasidagi dastlabki o‘yin juda muhim. Biz tarixda bunga guvoh bo‘lganmiz. Javob uchrashuvi — dastlabki uchrashuvning oqibati. Agar biz ertaga yaxshi natijaga erisha olsak, oldinga katta qadam tashlagan bo‘lamiz».
O‘yin boshlanishidan oldin futbolchilarning gap-so‘zlarida ko‘zga yaqqol tashlanadigan narsa o‘zaro hurmat va raqiblar sha'niga tonnalab maqtov yog‘dirilishi bo‘ldi. Masalan, Simeone o‘yin oldidan qachonlardir maydonda unga qarshi kurash olib borgan Zidanni klubda bir yildan ortiqroq vaqt ichida erishgan natijalari uchun rosa maqtadi.
«Zidan bosh murabbiy etib tayinlangach, katta hajmdagi ishlarni amalga oshirdi. U jamoadagi hammani baxtli qildi, to‘g‘ri muvozanatni topa bildi va katta maqsadlar sari ilgarilamoqda. Muhim o‘yinlar doimo qiyin bo‘lgan, bu galgi o‘yin ham mustasno bo‘lmaydi. Aniq qandaydir bir natija haqida o‘ylamayapman. Bizni juda qizg‘in o‘yin kutib turibdi. Biz erkin muhit yaratib, tashabbusga ega bo‘lamiz, deb umid qilaman. Javob uchrashuvi bizning maydonimizda bo‘lib o‘tadi, shu sababli bu o‘yinda gol ura olsak, u biz uchun katta foyda bo‘lardi», — deya Simeonening so‘zlarini keltiradi UYeFA sayti.
Men doim o‘yinlar oldidan biroz tahlikaga tushaman. Men voqe'likdan butkul uzilishim kerak. Meni mas'uliyat yuki bosib turibdi va u tobora og‘irlashib bormoqda. Buni men har qanday jamoaga qarshi o‘yinda sezaman.
«Real» o‘z uyida har doimgidek, butun kuch-qudratini namoyon etadi. «Qaymoqranglilar» Isko, Xames Rodriges va Asensio ishtirok etadigan turli taktik sxemalardan foydalanishi mumkin. Ular bizga yetarli muammo tug‘dirish payida bo‘lishadi, ayniqsa, o‘yin avvalida. Biz ularning bosimiga dosh berishimiz kerak. O‘yinning boshlang‘ich qismida bu oson ish bo‘lmaydi».
Bu o‘yin gollarga boy bo‘lishini kutish yaramaydi, boz ustiga dastlabki o‘yinda. Faqat shuni qayd etish kerakki, joriy mavsumda jamoalar har to‘rt o‘yindan bittasida so‘nggi 15 daqiqa ichida gol urishmoqda. «Qaymoqranglilar»da bunday gollar soni 40taga yetgan va ularning 25tasi Ispaniya chempionatida urilib, jamoaga 17 ochko keltirgan. Bu o‘yinning dastlabki soniyasidan so‘ngiga qadar ter to‘kishga to‘g‘ri keladi.
O‘yinda hakamlik angliyalik Martin Atkinsonga ishonib topshirilgan. U joriy mavsumda YeChLning uch o‘yinini boshqargan, jumladan, «Atletiko»ning PSVga qarshi mehmonda o‘tgan o‘yinini ham. Unda ispanlar minimal g‘alabaga erishishgan edi.
«Biz bu o‘yinlarda hakamlik nechog‘lik og‘ir bo‘lishini ham yaxshi bilamiz. Ishning qiyinligi stadionda muxlislar tomonidan yaratilgan muhit bilan tushuntirilishi mumkin. Lekin umid qilamizki, «Real»ga qarshi o‘yinda maydonda hakamning bor-yo‘qligi bilinmaydi va barcha o‘yindan bahra oladi», — degan o‘yinoldi matbuot anjumanida Simeone.
