Бугун Европа чемпионлар лигасининг 1/2 финалига дастлабки учрашуви бўлиб ўтади. Дастлабки учрашувда Мадриднинг икки жамоаси ўзаро тўқнаш келади. Tribuna.Uz финал остонасида дастлабки тўқнашувга батафсил тўхталади.

«Реал» – «Атлетико» (2 май, 23:45, UzReport, Матч ТВ, Матч! Футбол 1)

Европа чемпионлар лигаси финалида кетма-кет тўртинчи марта испан жамоаси финалда ўйнаши аниқ бўлди. Аммо сўнгги уч йилдаги финалда икки марта кузатилган испанча финал бу сафар бўлмайди. Чунки ўтган йилги финалчилар бу сафар ярим финалда ўзаро ҳисоб-китоб қилиб оладиган бўлди. 

Ўйиндан олдин

Атлетико

Диего Симеоне учун Мадрид дербисининг энг муҳим икки учрашуви фақат ёмон хотиралар билан қолган. Серхио Рамоснинг сўнгги сонияларда киритган голи ва иккинчисидаги биргина 11 метрлик жарима зарбаси ўйин тақдирини ҳал қилган тўқнашувлар. «Реал»дан ЕЧЛда қабул қилиб олинадиган яна бир мағлубиятга Симеоне чидай олмаса керак. Диего ЕЧЛ финалида кетма-кет икки мағлубият унинг учун қаттиқ зарба бўлгани, фақатгина чемпионлар лигаси унга мотивация бериб турганини жуда кўп маротаба таъкидлаб келади. Навбатдаги мағлубият унинг Мадриддаги сабр косасини тўлдириб юборса керак.

Фото: Twitter/@atleticomadrid

Реал

«Бавария» «Реал» учун ўзининг кучига муносиб баҳо бера олиш имконини яратди. Айнан мюнхенликлар Зидан жамоасига қулай бўлиб чиқди. «Реал» тезкор қарши ҳужумлар эвазига рақибни шошириб қўйди. Албатта, афсус билан айтиш мумкин, бу учрашув кўпроқ Виктор Кашшаининг ҳакамлиги билан эсланади. Аммо ҳакамлик қанчалик қўпол хатолар билан кўринган бўлмасин, «Реал» қарама-қаршиликларда кейинги босқичга чиқишга ҳақлидек таассурот уйғотганди. «Атлетико» бу борада айнан ўта ноқулай рақиблар сирасига киради. Зидан жамоаси иккинчи рақамда ўйнашни қанчалик яхши кўрса, «матрасчилар» бу ишнинг ҳадисини олишган ва ҳамшаҳарларига бундай ўйин кўрсатишга бермаслиги аниқ. Ҳозирги «Атлетико» тўпни нисбатан яхши назорат қилади. Аммо муҳим ўйинларда жамоа ўтган мавсумда бўлгани каби «Барселона» ва «Бавария»ни мусобақадан чиқариб юборган ультраҳимоявий ўйин услубига таяниб ўйнашини кутиш мумкин.

Фото: Twitter/@realmadrid

Бу қарама-қаршиликда яна бир факторни ҳисобга олиш керак – чемпионлик пойгаси. «Реал» Ла-лига «олтин»лари учун «Барселона» билан жиддий кураш олиб бормоқда, «Атлетико» куздаги натижалари эвазига аллақачон бу курашдан чиқиб кетган. Еврокубокдаги ғалаба – Диего Симеоне жамоасининг бу мавсумдаги ягона мақсади саналади.

Ўзаро учрашувлар тарихи

Еврокубокларда икки жамоа ўртасидаги тўқнашувлар тарихи титкиланса биринчи наватда дарҳол икки финал учрашуви ёдимизга тушади. Аммо жамоалар бундан ташқари 2014/2015 йилги мавсумда ЕЧЛ чорак финалида ҳам ўзаро рўбарў келишган. «Висенте Кальдерон»да ҳисоб очилмаган бўлса, «Бернабэу»да ягона гол ўйин тақдирини мезбонлар фойдасига ҳал қилганди. Умумий еврокубоклар статистикаси «Атлетико» учун қуйидагича: «Реал»га қарши еврокубок плей-оффларида 4та тўқнашув (1959-йилда ҳам учталик ўйинда «Реал» ғолиб чиққан) барчасида «қаймоқранглилар» учун керакли натижа билан тугаган.

Фото: Twitter/@realmadrid

Қизиқарли фактлар

— «Атлетико» ЕЧЛ плей-оффида кетма-кет 10 учрашувдирки тўп ўтказиб юбормаяпти. Диего Симеоне жамоаси сўнгги марта 2014 йилнинг мартида «Милан»дан (Кака гол урганди) гол ўтказганидан буён ўз уйида фақат ва фақат қуруқ серия ўтказмоқда.

Фото: Twitter/@atleticomadrid

— Аммо «Реал» кетма-кет 55 учрашувдан буён гол уришнинг уддасидан чиқиб келмоқда. Агар бу статистикани бўлажак ўйингача сақлаб қолса, қайсидир узоқ давом этган сериянинг тугашига гувоҳ бўламиз.

— Бу икки жамоанинг еврокубоклардаги 5-учрашуви бўлади.

— Бу Мадрид жамоаларининг 28 марта еврокубоклар ярим финалида иштирок этиши бўлади.

— «Реал» кетма-кет 7 марта ЕЧЛ ярим финалида иштирок этади.

— «Реал» ЕЧЛда 14 учрашувдан буён мағлубиятга учрамаяпти (9Ғ, 5Д).

Йўқотишлар

«Реал» таркибида Гарет Бейл майдонга туша олмайди. Шунингдек Пепе ҳам жароҳати сабаб бу учрашувни ўтказиб юборишига тўғри келади. Рафаэль Варан эса умумий гуруҳ машғулотларига қайтган.

Фото: Twitter/@realmadrid
Фото: Twitter/@realmadrid

«Атлетико» таркибида Хуанфран, Хосе Хименес ва Фернандес жароҳати сабаб учрашувни ўтказиб юборади. Шиме Врсальконинг иштироки эса сўроқ остида қолмоқда

Тахминий таркиблар

Фото: soccer365.com

«Реал» чемпионатда дам берган Иско хизматидан бу учрашувда фойдаланиши кутилмоқда. Шунингдек Рафаэль Варан жароҳатлардан сўнг асосий таркибга қайтиши керак. «Атлетико» таркибида эса ўнг қанотнинг икки вакили ҳам жароҳат олгани сабаб Эрнандес бу ўринни эгаллаши кутилмоқда.

Реал Мадрид: Навас; Карвахал, Рамос, Варан, Марсело; Кроос, Каземиро, Модрич; Иско, Бензема, Роналду.

Атлетико: Облак; Эрнандес, Годин, Савич, Филипе Луис; Саул Нгиес, Коке, Габи, Феррейра-Карраско; Гризманн, Гамейро.