2017 йилнинг 4 май куни Бухоро вилояти ИИБда  вилоят ҳудудида жиноятчиликнинг аҳволи, жиноят ва ҳуқуқбузарликларга қарши курашиш, жамоат тартибини сақлаш, аҳоли тинчлиги ва осойишталигини таъминлаш, вилоят ҳудудида ҳуқуқбузарликлар профилактикасини амалга оширишда тизим ходимлари томонидан олиб борилаётган ишлар натижасига бағишланган брифинг ўтказилди.

Унда Бухоро вилояти ИИБ бошлиғининг ўринбосари полковник О.А.Ҳасанов оммавий-ахборот воситалари вакилларига амалга оширилаётган самарали ишлар баробарида соҳа ходимлари томонидан фаолиятда йўл қўйилаётган камчиликлар, келгусида ҳудудларда осойишталикни таъминлаш мақсадида белгилаб олинган вазифалар хусусида ахборот берди.

Хусусан, полковник О.Ҳасанов ўзининг маърузасида жорий йилнинг 27 апрелдан 4 май кунига қадар-ҳафта давомида вилоят ҳудудида жами  63   та, шундан, Бухоро шаҳрида  17 та, Ғиждувон ва Қоракўл туманларида  8 тадан, Когон шаҳрида 6 та, Бухоро туманида 5 та, Шофиркон туманида 4 та, Олот, Ромитан ва Вобкент туманларида 3 тадан, Жондор ва Пешкў туманларида 2 тадан, Когон туманида эса 1 та жиноятлар содир этилиб, вилоятнинг Қоровулбозор туманида жиноят содир этилишига йўл қўйилмаганлигини таъкидлаб ўтди.

Ушбу жиноятларнинг 56 таси фош этилиб, жиноятларнинг очилиши 88,9 фоизни ташкил қилганлиги, 63 та жиноятларнинг 12 таси ички ишлар идоралари ходимларининг шахсий ташаббусларига асосан аниқланганлиги, қайд қилинган жиноятларнинг 1 таси қасддан одам ўлдиришга суиқасд, 1 та номусга тегиш,  13 та ўғрилик,  10 та фирибгарлик,  3 та тан жароҳати етказиш билан боғлиқ, 1 та вояга етмаган билан жинсий алоқада бўлиш, 1 та савдо қоидаларини бузиш билан боғлиқ, 1 та қийнаш, 4 та ҳужжатларни қалбакилаштириш, 1 та вояга етмаган шахсни жиноят содир қилишга жалб қилиш, 1 та пора беришга суиқасд қилиш, 1 та товламачилик, 1 та мулкни қасддан нобуд қилиш, 3 та иқтисодиёт соҳасидаги ҳамда 8 та бошқа турдаги жиноятлар эканлиги айтиб ўтилди.

Бундан ташқари, ҳафта давомида вилоят ҳудудида қайд қилинган жами 6 та ўғрилик жиноятлари очилмасдан қолган бўлсада, олиб борилган тезкор тадбирлар давомида аввал содир этилиб, очилмасдан қолган 4 та жиноятлар фош этилганлиги таъкидланиб, ушбу очилмай қолаётган ўғрилик жиноятларининг келиб чиқиш сабаблари, унга шароит ва имкон яратиб берган омиллар таҳлиллар асосида ўрганилганда, аксарият ўғрилик ҳолатларининг юзага келишида фуқароларимизнинг ўзлари ҳам сабабчи эканликлари аниқ мисоллар билан таъкидлаб ўтилди.

Ўтган ҳафта давомида вояга етмаган шахслар томонидан 2 та ўғрилик жиноятлари содир этилишига йўл қўйилганлиги айтиб ўтилди. Шунингдек, ҳисобот ҳафтаси давомида вилоят бўйича 3 нафар қидирувда юрган жиноятчилар қўлга олиниб, қонунларда белгиланган жазонинг муқаррарлиги таъминланганлиги таъкидланди.

Шунингдек, брифинг давомида ички ишлар идоралари ходимлари томонидан амалга оширилиб келинаётган ишларни ўз вақтида аҳолига етказиб бориш, жиноят ва ҳуқуқбузарликларнинг олдини олиш, профилактик тадбирларни амалга оширишда оммавий-ахборот воситаларининг ролини янада кучайтиришга, улар билан ҳамкорликни мустаҳкамлашга қаратилган чора-тадбирлар белгилаб олинди.

Бахтиёр Раҳматов, капитан
Бухоро вилояти ИИБ