Қозоғистон ҳукумати Сурия бўйича Остонада бўлиб ўтган тўртинчи ҳалқаро учрашув натижаларини юқори баҳолайди. Бу ҳақда республика ташқи ишлар вазирлиги матбуот хизмати баёнотида сўз юритилмоқда, деб хабар берган ТАСС агентлиги.  

"Қозоғистон Сурия бўйича Остонадаги тўртинчи халқаро учрашувни ушбу мамлакатда тинчлик ўрнатиш борасида ташланган қадам деб баҳолайди ҳамда томонларни барча келишувларни бажаришга чақиради. Шу билан бирга, Сурия можаросини сиёсий йўл билан ҳал этишда халқаро саъй-ҳаракатларни қўллаб-қувватлашга тайёрлигини билдиради", - дейилади хабарда.

Таъкидланишича, бу сафарги учрашувда эришилган энг юқори натижа кафолат берувчи мамлакатлар томонидан Сурияда хавфсизликни таъминлаш мақсадида махсус ҳудудларни ташкил этиш меморандуми бўлди. У "мамлакатда зўравонликларга барҳам бериш, мамлакат ҳудудий яхлитлиги ва бирлигини сақлаш, зиддиятни сиёсий йўл билан ҳал этиш"га хизмат қилади.

"Имзоланган ҳужжатда таъкидланишича, тўртта хавфсизлик ҳудудлари чегарасида барча зиддиятли томонлар жанговар ҳаракатларни тўхтатиши керак. Ушбу ҳудудларга  Идлиб вилояти ва Латакия, Хама ва Ҳалаб вилоятларининг бир қисми, Хомс вилоятининг шимолий ҳудудлар ва Шарқий Гута, шунингдек, Сурия жанубидаги Дара ва Ал Кунайтра минтақалари киритилган. Бу ҳудудларда ҳар қандай турдаги қурол-яроғлар, жумладан авиациядан фойдаланиш тақиқланган. Гуманитар ёрдамларни етказиш, қочқинларнинг ўз уйларига хавфсиз қайтишлари учун шароит яратиш кўзда тутилган". 

Эслатиб ўтамиз, 3-4 май кунлари Қозоғистон шаҳри пойтахти Остона шаҳрида Сурия бўйича Остона учрашувларининг тўртинчи босқичи бўлиб ўтди.